टीकापुर, असार ३
एक यात्रुबाहक बस ठोक्किँदा विद्युतको पोल भाँचिएर सडकमा लत्रिएको विद्युतको तार चार दिनसम्म पनि उठेको छैन ।
टीकापुरको मुख्य सडक टीकापुर लम्की सडकखण्डको जमरापुल नजिकै जेठ ३१ गते ना.४ ख. २२३२ नम्बरको बस पोलमा ठोकिएर तार लत्रिएको थियो ।
बसका कारण तीनवटा विद्युतको पोल ढलेका छन् । विद्युतको नांगो तार चार दिनदेखि सडकमै छ । बस इलाका प्रहरी कार्यालय टीकापुरको नियन्त्रणमा छ । पोल ढल्दा विद्युतको तार, टेलिकमको तार तथा इन्टरनेटका तारहरु समेत सडकमै छन् ।
चार दिन बित्दा समेत सडकमा लत्रिएको तार नउठ्दा आवातजावतमा सास्ती भएको छ । स्थानीय ललिता परियारले भने ‘आउजाऊ गर्न समेत समस्या छ, नाङ्गो तार सडकमा हुँदासम्म विद्युत कार्यालयले हटाउन पहल गरेको छैन ।’
स्थानीय व्यापारीहरुले समेत सडकमा तार भएका कारण समस्या भएको बताए । विद्युत पोल ढल्दा जमरापारी रहेको विष्ट आयल स्टोर जान समेत समस्या भएको छ ।
झण्डै दुई शय मिटर तार सडकमा परिरहँदा समेत नेपाल विद्युत प्राधिकरणको टीकापुर शाखाका प्रमुख माधव महतले पोलमा ठक्कर दिने यात्रुबाहक बसले क्षतिपूर्ति नतिर्दासम्म सडकबाट तार हटाउन नसकिने बताए ।
महतले भने ‘बस प्रहरीको नियन्त्रणमा छ, हामीले झण्डै ७० हजारको इस्टिमेट गरेका छौं, त्यो रकम जम्मा भएपछि हटाउँछौं ।’
नेपाल विद्युत प्राधिकरण शाखा कार्यालय टीकापुरका प्रमुख माधव महतसँगको कुराकानी सुन्नुहोस्ः
