टीकापुर, जेठ १४
टीकापुर जेसिजको आतिथ्यतामा आगामी भदौ महिनामा हुने एरिया ‘डी’ सम्मेलन टीकापुरबासीकै आयोजना भएको टीकापुर नगरपालिकाका नगर प्रमुख रामलाल डगौरा थारुले बताएका छन् ।
जेसिजद्धारा आज आयोजित टीकापुर नगरापालिकाका नवनिर्वाचित जनप्रतिनिधिहरुलाई बधाई तथा शुभकामना कार्यक्रमलाई सम्बोधन गर्दै नगर प्रमुख थारुले बताएका हुन् ।
देशभरका १८ वर्षदेखि ४० वर्ष उमेर समूहका जेसिजहरुको सहभागिता रहने एरिया ‘डी’ सम्मेलनले टीकापुरमा आर्थिक तथा पर्यटकीय गतिविधिमा टेवा पुग्ने बताउँदै नगर प्रमुख थारुले एरिया ‘डी’ सबै मिलेर सफल पार्नुपर्ने बताए ।
‘यो हामी सबै नगरबासीको आयोजना हो, टीकापुरको आर्थिक र पर्यटन विकासका लागि यस्ता सम्मेलनले सहयोग गर्नेछ’ थारुले भने ‘सम्मेलन सफल पार्न हामी सहयोग गर्ने प्रतिबद्धता व्यक्त गर्दछौं ।’
कार्यक्रममा विशिष्ठ अतिथिको आशनबाट बोल्दै नगर उपप्रमुख खडकबहादुर शाहले जेसिज असाधारण क्षमता भएका युवाहरुको संगठन भएको बताउँदै युवाहरुका लागि सहयोग गर्ने बताए ।
कार्यक्रममा जेसिजको वर्ष २०७९ को भित्तेपात्रो समेत विमोचन गरिएको छ । कार्यक्रमका प्रमुख अतिथि थारु र विशिष्ट अतिथि शाहले भित्तेपात्रो विमोचन गरेका हुन् ।
टीकापुर जेसिज वर्ष २०२२ का अध्यक्ष टोपप्रकाश वि.क.को अध्यक्षतामा भएको कार्यक्रममा पूर्व राष्ट्रिय महासचिव टेकराज रेग्मी, पूर्व अध्यक्ष कृतिसिंह बम, रामबहादुर भण्डारीलगायतले बोलेका थिए ।
