टीकापुर, जेठ ८
निर्वाचन अधिकृतको कार्यालयले आज टीकापुर नगरपालिकामा नवनिर्वाचित जनप्रतिनिधिहरुलाई एक समारोहकाबीच विजयी प्रमाण पत्र वितरण गरेको छ ।

निर्वाचन अधिकृत पुष्कर खड्काले मेयर रामलाल डगौरा थारु, उपमेयर खडकबहादुर शाह लगायत नौवटै वडाका वडाध्यक्षहरुलाई विजयी प्रमाण पत्र वितरण गरेका हुन । खड्काको अध्यक्षतमा सम्पन्न भएको कार्यक्रममा सबै नवनिर्वाचित वडा सदस्यहरुको समेत उपस्थिति रहेको थियो ।

प्रमाण पत्र वितरण गर्दै निर्वाचन अधिकृत खड्काले जनताको भावना अनुसार काम गर्न अनुरोध गरेका छन । उनले सबै नगरबासीलाई समान व्यवहार गरेर जिम्मेवार अभिभावकको भूमिका निर्वाह गर्नुपर्नेमा जोड दिए ।

सो अवसरमा टीकापुर नगरपालिकाका प्रमुख प्रशासकीय अधिकृत मंगल शाह, इलाका प्रहरी कार्यालय टीकापुरका डिएसपी हेम शाही लगायतले बोलेका थिए ।

त्यस्तै जानकी र जोशीपुर गाउँपालिकामा समेत निर्वाचन अधिकृतको कार्यालयले विजेता प्रमाण पत्र वितरण गरेको छ ।