टीकापुर, जेठ ५
कैलालीका विभिन्न ठाँउबाट लागु औषध सहित चार जना युवा पक्राउ परेका छन । जिल्ला प्रहरी कार्यालय कैलालीका अनुसार उनीहरुको साथबाट लागु औषध बरामद भएको छ ।

धनगढी उपमहानगरपालिका–२ ट्राफिक चोक नजिकैबाट दुई जना पक्राउ परेका छन । पक्राउ पर्नेमा गोदावरी नगरपालिका–२ का १९ वर्षका धर्म चन्द र सोही ठाउँका १७ वर्षका सन्तोष सार्की रहेका छन ।

उनीहरुको साथबाट २३० मिलिग्राम खैरो हिरोईन बरामद भएको प्रहरीले जानकारी दिएको छ ।

यसैगरी प्रहरीले धनगढी उपमहानरपालिका–४ स्थित क्रिस्टल होटल नजिकैबाट एक जनालाई पक्राउ गरेको छ । उनलाई सादा पोसाकमा रहेका प्रहरीले पक्राउ गरेको हो ।

पक्राउ पर्नेमा गौरीगंगा नगरपालिका –१ का २५ वर्षका जीवन चौधरी छन । उनको साथबाट ५ ग्राम खैरो हिरोईन बरामद भएको छ ।

त्यस्तै इलाका प्रहरी कार्यालय भजनीको टोलीले भजनी नगरपालिका–३ हुलाकी राजमार्गबाट एक जनालाई पक्राउ गरेको छ । प्रहरीका अनुसार भजनी नगरपालिका–३ का २८ वर्षका सुकमेन्द्र सिँह पक्राउ परेका छन ।
उनको साथबाट २ ग्राम ८०० मिलिग्राम खैरो हिरोईन बरामद भएको छ । उनीहरु सबैलाई नियन्त्रणमा लिएर थप अनुसन्धान भैरहेको प्रहरीले जानकारी दिएको छ ।