टीकापुर, जेठ २
कैलालीको जोशीपुर गाउँपालिकामा राप्रपाले अग्रता लिएको छ । यसअघि अग्रस्थानमा रहेको नागरिक उन्मुक्ति पार्टीलाई पछि पार्दै राप्रपाले अग्रता लिएको हो ।
राप्रपाका तर्फबाट अध्यक्षका उम्मेदवार भीमबहादुर बमले नागरिक उन्मुक्तिका चित्रबहादुर चौधरीलाई ६७ मतले पछि पारेका छन । अहिले वडा नं. ३ को ४०० मत गणना हुँदा बमले १ हजार २७१ मत पाएका छन भने चौधरीले १ हजार २०४ मत पाएका छन । त्यस्तै काँग्रेसका बन्सराम बडायकले १ हजार २८, जसपाका चन्द्र प्रकाश चौधरीले ७२४ र एमालेका केशरबहादुर डगौराले ३२७ मत पाएका छन ।
यसअघि वडा नं. १ र २ को मत गणना भैसकेको छ । वडा नं. १ मा नागरिक उन्मुक्तिका रामचन्द्र चौधरी पूरै प्यानल सहित विजयी भएका छन भने वडा नं. २ मा जसपाका विष्णुप्रसाद डगौरा तीन सदस्य सहित विजयी भएका छन । एक खुल्ला सदस्यमा नागरिक उन्मुक्तिका सोहनलाल चौधरी विजयी भएका छन ।
अध्यक्षमा राप्रपाले अग्रता लिएपनि उपाध्यक्षमा भने नागरिक उन्मुक्ति नै अघि रहेको छ । नागरिक उन्मुक्तिका तर्फबाट उपाध्यक्ष रेखादेवी कठरियाले हालसम्म १ हजार २२६ मत पाएकी छन । उपाध्यक्षमा उनलाई काँग्रेसकी किरण चौधरीले पछ्याईरहेकी छन । चौधरीको १ हजार २२ मत रहेको छ । उपाध्यक्षमा राप्रपाका ममता चौधरीको ६३३ मत रहेको छ ।
