टीकापुर, भदौ २२
लामो समयदेखी बन्द रहेका विद्यालय सञ्चालनको तयारीमा जुटेका छन । टीकापुर नगर शिक्षा समितिले आइतवार (भदौ २० गते) सरकारले तोकेको मापदण्ड पालना गरेर विद्यालय सञ्चालन गर्न सकिने निर्णय गरेको छ ।

समितिको निर्णय पश्चात सामुदायिक र संस्थागत दुवै खाले विद्यालयले कक्षा सञ्चालनको तयारी थालेका छन । केही संस्थागत विद्यालयले सोमवार (भदौ २१ गते) देखी नै कक्षा सञ्चालन गरिसकेका छन ।

प्याब्सन टीकापुरका अध्यक्ष जयकृष्ण तिमिल्सिनाले विद्यालयले धमाधम कक्षा सञ्चालन सुरु गरिसकेको बताए । उनले विद्यार्थीको संख्या कम भएपनि विद्यालयले कक्षा सुरु गरेको जानकारी दिए ।

‘सबै विद्यार्थी आईसकेका छैनन्’ उनले भने–‘तर धेरैजसो विद्यालय सञ्चालन भैसकेका छन ।’

उनले विद्यालय सञ्चालनका बारेमा सबै विद्यार्थीले जानकारी नपाएका कारण पनि संख्या कम भएको हुनसक्ने बताए ।

सामुदायिक विद्यालयहरुले भने विद्यालय व्यवस्थापन समिति, शिक्षक अभिभावक संघ र शिक्षकहरुको संयुक्त बैठक बसेर विद्यालय सञ्चालनको तयारी थालेका छन । उनीहरुले विद्यालय सञ्चालनको संयुक्त निर्णय गरेर नगर शिक्षा समितिमा बुझाउने बताए ।

नेपाल शिक्षक महासंघ टीकापुरका अध्यक्ष रघुनाथ उपाध्यायले अधिकांश विद्यालयले यस्तो निर्णय गरिसकेको जानकारी दिए । उनले धेरैजसो विद्यालयले कक्षा समेत सञ्चालन गरिसकेको बताए ।

‘धेरैजसो विद्यालयले कक्षा सञ्चालन गरिसकेका छन’ उनले भने–‘विद्यालय खुलेकोमा विद्यार्थी समेत उत्साहित छन ।’

सरकारले विद्यालयले एक कक्षा कोठामा बढीमा ३० जना विद्यार्थी राख्नुपर्ने, मास्क, सेनिटाईजर र साबुन पानीको अनिवार्य व्यवस्था गर्नुपर्ने लगायतका मापदण्ड तोकेको छ । विद्यालयले सरकारले तोकेका सबै मापदण्ड पूरा गरेर कक्षा सञ्चालन गर्ने कुरामा सहमति जनाएका छन । ‘हामी सबै मापदण्ड पूरा गरेर कक्षा सञ्चालन गर्छौं’ अध्यक्ष उपाध्यायले भने–‘विद्यार्थीको स्वास्थ्य प्रति विद्यालय प्रशासन संवेदनशील छ ।’

तर विद्यालय सञ्चालन भएपनि विद्यार्थीहरुमा भने कोरोनाको त्रास देख्न सकिन्छ । उनीहरु विद्यालय जान डराईरहेका छन । टीकापुर नगरपालिका–४ बाघमारास्थित जनप्रकाश आधारभूत विद्यालयमा कक्षा ८ मा अध्ययनरत अनु चौधरीले खोप नलगाएका कारण डर लागिरहेको बताईन ।

उनले विद्यालय खुलेकोमा खुशी भएपनि कतै कोरोना लाग्ने हो कि भन्ने डर भने मनमा भैरहेको बताईन । ‘धेरै पछि विद्यालय आउन पाईयो, यसमा खुशी नै छु’ उनले भनिन्–‘खोप लगाएको छैन । कतै कोरोना सर्ने पो हो कि ?’

कोरोनाका कारण विद्यालय लामो समयदेखी बन्द रहे । अघिल्लो शैक्षिक वर्षमा विद्यार्थीले परीक्षा नदिएरै विद्यालयले परीक्षाफल सार्वजनिक गर्नु परेको थियो । विद्यार्थीहरुले शैक्षिक वर्षको अन्त्यमा विद्यालय बन्द रहेका कारण परीक्षा दिन पाएनन् । चालु शैक्षिक वर्षमा समेत हालसम्म विद्यालय खुल्न सकेका थिएनन् ।

जिल्ला प्रशासन कार्यालय कैलालीले यही १७ गते एक आदेश जारी गरेको थियो । जसमा शैक्षिक संस्थाहरुले सकेसम्म भौतिक उपस्थिति नभई भर्चुअल माध्यमबाट पठनपाठन गराउने र यदि भौतिक रुपमै पठनपाठन गराउने भए सरकारले साउनमा जारी गरेको स्मार्ट लकडाउन सम्बन्धी कार्यविधिको प्रावधान भित्र रहेर विद्यालय सञ्चालन गर्ने उल्लेख छ ।

स्थानीय पालिकाहरुले जिल्ला प्रशासन कार्यालय कैलालीको सोही आदेशलाई आधार मानेर धमाधम विद्यालय सञ्चालनको निर्णय थालेका छन ।