टीकापुर, साउन ३२

टीकापुर जेसीजले साप्ताहिक कार्यक्रमको पाँचौं दिन आज टीकापुरमा ट्राफिक सचेतना सम्बन्धी कार्यक्रम गरिएको छ । ट्राफिक सचेतनाको कमीका कारण सडक दुर्घटना भइरहेको सन्दर्भमा जेसिजले ट्राफिक सचेतना कार्यक्रम सम्पन्न गरेको हो । जेसिजले खडग चोकमा ट्राफिक चिन्ह सम्बन्धी होर्डिङ बोर्ड राखेको छ भने ट्राफिक जानकारीमूलक पम्पलेट समेत वितरण गरेको थियो । वर्ष २०२१ का उपाध्यक्ष वीरेन्द्र कुँवरको अध्यक्षतामा भएको सचेतना कार्यक्रमका प्रमुख अतिथि टीकापुर जेसीजका पूर्व अध्यक्ष जगदिश्वर पण्डित रहेका थिए ।

कार्यक्रमलाई सम्बोधन गर्दै प्रमुख अतिथि पण्डितले ट्राफिक सचेतनाको कमीका कारण सडक दुर्घटनाहरु बढ्दै गएको बताए । जेसिजले आफ्नो साप्ताहिक कार्यक्रममा ट्राफिक प्रहरीसँगको सहकार्यमा सचेतना कार्यक्रम गर्नु निकै सान्दर्भिक रहेको बताउँदै आगामी दिनमा समेत यस्ता कार्यक्रममा जोड दिन आग्रह गरे ।

कार्यक्रममा जेसिजका कोषाध्यक्ष मंगल साउँदले स्वागत गरेको कार्यक्रममा धन्यवाद शाखा अध्यक्ष लक्ष्मण थापाले मन्तव्य राखेका थिए । कार्यक्रममा पूर्व अध्यक्ष चक्रपाणी सापकोटा, ट्राफिक प्रहरी श्यामराज भट्ट लगायतले बोलेका थिए भने कार्यक्रमका जेसिज आस्थापाठ उपाध्यक्ष रुपकबहादुर विष्टले पाठ गरेका थिए । जेसिजको मिसन र भिजनमाथि कानुनी सल्लाहकार टोप प्रकाश वि.क.ले प्रष्ट्याएका थिए ।

जेसीज साप्ताहिक कार्यक्रमको छैठौं दिन मंगलवार विहान पत्रकार र जेसिज बिच मैत्रीपूणर् व्याडमिन्टन प्रतियोगिता हुने जनाइएको छ । कार्यक्रमका संयोजक प्रकाश शाहले बसपार्कस्थित ब्याडमिन्टन कोर्डमा हुने ब्याडमिन्टन प्रतियोगितामा वरिष्ठ पत्रकार गणेश चौधरी र परमानन्द पाण्डेको जोडी र जेसिजका तर्फबाट पूर्व अध्यक्ष टेकराज रेग्मी र कोषाध्यक्ष मंगल साउँदको जोडीबिच खेल हुनेछ ।