टीकापुर, साउन ३१

टीकापुर जेसीजले साप्ताहिक कार्यक्रमको चौथो दिन आज दौलतपुर मसान घाटमा सरसफाई तथा फोहोर व्यवस्थापन गरेको छ । मसान घाटलाई सरसफाईयुक्त र व्यवस्थित बनाउने उद्देश्यले सरसफाई गरिएको हो । मसान घाटमा सरसफाई गर्नुका साथै फोहोर व्यवस्थापनका लागि ड्रमहरु राखिएको छ ।

वर्ष २०२१ का खेलकुद संयोजक भुपेन्द्र खड्काको अध्यक्षतामा भएको सरसफाई कार्यक्रमका प्रमुख अतिथि टीकापुर जेसीजका पूर्व अध्यक्ष एवं नेपाल जेसीजका पूर्व उपाध्यक्ष गणेश बहादुर साउँद रहेका थिए ।

कार्यक्रमलाई सम्बोधन गर्दै प्रमुख अतिथि साउँदले राज्यको नजरमा नपरेको मसान घाटको सरसफाई र फोहोर व्यवस्थापनमा सबै नागरिकले चासो दिनुपर्ने बताए । मसान घाट पवित्र स्थल भएकाले यसको सरसफाई र व्यवस्थापन अति आवश्यक भए पनि राज्यको दृष्टि नपरेका कारण व्यवस्थित हुन नसकेको साउँदले बताए ।

दौलतपुर घाटमा भएको कार्यक्रममा स्वागत टीकापुर जेसिजका कार्यकारिणी उपाध्यक्ष सन्तोष खड्काले गरेका थिए भने धन्यवाद शाखा अध्यक्ष लक्ष्मण थापाले दिएका थिए । जेसीज साप्ताहिक कार्यक्रम भदौ २ गतेसम्म विभिन्न कार्यक्रमसहित सञ्चालन हुने कानुनी सल्लाहकार टोप प्रकाश वि.क.ले जानकारी दिएका छन् ।