टीकापुर, असार २३
टीकापुर जेसिजले आफ्नो २४औं जन्मोत्सवको अवसरमा विपन्न तथा जेहेन्दार विद्यार्थीलाई छात्रवृत्ति प्रदान गरेको छ ।
टीकापुर नगरपालिका क्षेत्रका दुईवटा सामुदायिक विद्यालयका एक छात्र एक छात्रा गरी चार जना विद्यार्थीलाई छात्रवृत्ति प्रदान गरिएको हो । छात्रवृत्ति पाउनेमा खड्ग स्मृति माध्यमिक विद्यालयमा कक्षा १० मा अध्ययनरत मुकेश थापा र कक्षा ८ मा अध्ययनरत बब्ली थापा रहेका छन् ।
त्यस्तै टीकापुर नगरपालिका वडा नं. ३ शंकरपुरमा रहेको केदारेश्वर प्राथमिक विद्यालयमा कक्षा ४ का गायत्री वि.क. र कक्षा ३ का दीपकबहादुर वि.क.लाई छात्रवृत्ति प्रदान गरिएको हो ।
टीकापुर जेसिजका संस्थापक अध्यक्ष प्राध्यापक डाक्टर जगतबहादुर सिंह रावलले उनीहरुलाई जनही ५ हजार ५ शय ५५ रुपैयाँका दरले छात्रवृत्ति प्रदान गरेका हुन् ।
कार्यक्रमका प्रमुख अतिथि समेत रहेका प्रा.डा. रावलले जेसिज जेसिज मात्रै नभएर स्कुलिंग भएको बताए । जेसिज अभियानलाई विश्वविद्यालयको संज्ञा दिँदै उनले युवाहरुलाई थुप्रै कुरा सिक्ने अवसर जेसिज प्राप्त हुने बताए ।
टीकापुर जेसिज वर्ष २०२१ का अध्यक्ष लक्ष्मण थापाको अध्यक्षतामा भएको कार्यक्रममा पूर्व अध्यक्ष कृतिसिंह बम, आनन्द हमाल, नारायणपुर जेसिजका अध्यक्ष बलिराम चौधरी, केदारेश्वर प्राथमिक विद्यालयका प्रधानाध्यापक बद्रीप्रसाद भट्टराई लगायतले शुभकामना मन्तव्य राखेका थिए ।
कार्यक्रममा उपस्थित अतिथिहरुलाई २४ औं स्थापना दिवसका संयोजक भरत भण्डारीले स्वागत गरेका थिए ।
