टीकापुर, बैशाख ६
दाश्रो चरणको कोरोना भाइरस फैलिएसँगै सेती प्रादेशिक अस्पतालको इमरजेन्सी वार्डमै तीन जनाको मृत्यु भएको छ ।
जिल्ला प्रशासन कार्यालय कैलालीका सूचना अधिकारी शिवराज जोशीले हाम्रोपत्रलाई दिएको जानकारी अनुसार उपचारका क्रममा मृत्यु हुनेमा कञ्चनपुरको भिमदत्त नगरपालिका १२ घर भएका ७१ वर्षीय पुरुष, दार्चुलाको मालिकार्जुन गाउँपालिका वडा नम्बर ८ का ६६ वर्षीय पुरुष र बझाङका २६ वर्षीय पुरुष रहेका छन् ।
दार्चुलाका पुरुषको सोमबार राति ९ बजे, बझाङका पुरुषको साढे १० बजे र कञ्चनपुरका पुरुषको मंगलबार बिहान ३ बजेको समयमा इमरजेन्सी वार्डमै मृत्यु भएको हो । उनीहरु तीनै जनाको एन्टिजेन विधिबाट गरिएको परीक्षणमा कोरोना पुष्टि भएको थियो ।
यो सँगै कोरोना संक्रमणबाट कैलालीमा मंगलवार छ जनाको ज्यान गएको छ । कोरोना भाइरस संक्रमणबाट धनगढी उपमहानगरपालिका वडा नम्बर ७ की ७७ वर्षीया महिला र वडा नम्बर १३ का २२ वर्षीय पुरुषको मृत्यु भएको हो ।
ती पुरुषको सोमबार राति साढे ११ बजे र महिलाको मंगलबार बिहान साढे २ बजे मृत्यु भएको जोशीले हाम्रोपत्रलाई बताए ।
मृत्यु भएका पुरुषको सोमबार मात्रै सेती प्रादेशिक अस्पतालमा भर्ना गरी एन्टिजेन विधिबाट परीक्षण गर्दा कोरोना पोजेटिभ आएको थियो भने महिलाको गत १२ गते पीसीआर रिर्पोट पोजेटिभ आएको थियो ।
यस्तै अस्पतालमै उपचाररत बर्दियाका ३० वर्षीय पुरुषको मृत्यु भएको छ । सोमबार श्वासप्रश्वासमा समस्या देखिएपछि उनलाई अस्पताल भर्ना गरिएको थियो । पीसीआर रिपोर्ट पोजेटिभ आएका उनको मंगलवार विहान २ बजेको समयमा उपचारको क्रममा मृत्यु भएको जोशीले बताए ।
