बौनिया, सुखड १३

कैलालीको बर्दगोरिया गाउँपालिकामा बालबाटिका क्रिकेट लिग हुने भएको छ । नव बालबाटिका विद्या मन्दिरले ठुलो धनराशिको द्रोस्रो संस्करणको क्रिकेट प्रतियोगिता आयोजना गर्ने भएको हो । विद्यालयले मङ्गलवार पत्रकार सम्मेलन गर्दै आयोजना गर्ने लिगका बारेमा जानकारी दिएको छ ।

पहिलो संस्करणको लिग सफलता पूर्वक सम्पन्न भएपछि विद्यालयले द्रोस्रो संस्करणको लिग सञ्चालन गर्न लागेको हो ।'व्यक्तित्व विकास, पारस्परिक सहयोग एवं स्वास्थ्यका लागि खेल' भन्ने मूल नाराका साथ फागुन १ गतेबाट १४ गतेसम्म क्रिकेट प्रतियोगिता हुने बताइएको छ ।

विद्यालयस्तरबाटै सबल, सक्षम, सृजनशील र अनुशासित क्रिकेट खेलाडीहरू उत्पादन गर्ने तथा बौनियालाई क्रिकेट सहरको रूपमा चिनाउने उद्देश्यले क्रिकेट लिग आयोजना गरिएको मूल आयोजक समितिका संयोजक एवं नव बालबाटिका विद्या मन्दिरका संस्थापक प्रिन्सिपल प्रमोद मल्ले बताए ।

विद्यालयस्तरबाट नै क्रिकेट खेलाडी उत्पादन गर्ने, क्रिकेटमा नै आफ्नो भविष्य खोजिरहेका खेलाडीहरुको हौसला प्रदान गर्ने, सबल, सक्षम, र्सिजनशिल र अनुशासित खेलाडी उत्पादनमा टेवा पुर्‍याउने र बौनियाँलाई क्रिकेटको सहरको रूपमा चिनाउने उद्देश्य रहेको मल्लले जानकारी दिए ।

कोभिड १९ ले गर्दा विद्यार्थीहरूमा पर्न गएको मनोवैज्ञानिक असर मेटाउनका निम्ति देशकै सबै भन्दा ठुलो धनराशिको द्रोश्रो विद्यालय स्तरीय बालबाटिका क्रिकेट लिग क्रिकेट प्रतियोगिता हुन लागेको बताएको छ ।

प्रतियोगितामा सुदूरपश्चिम प्रदेश र प्रदेश नम्बर ५ गरी १६ टिमको सहभागिता हुनेछ । प्रतियोगितामा प्रथम हुने टिमले १ लाख १५ हजार ११ सय १ रुपैयाँ र द्धितिय हुनेले ५७ हजार ५ सय ५५ रुपैयाँ पुरस्कार प्राप्त गर्ने छन् भने उत्कृष्ट खेलाडीहरूले पनि धनराशिको पुरस्कार प्राप्त गर्ने भएका छन् ।

प्रतियोगिता लिक कम नकाउट प्रणालीका आधारमा मुडा बजारको खेल मैदानमा खेलाइने आयोजकले जनाएको छ ।