टीकापुर, पुस १०
सर्वोच्च अदालतले सरकारलाई संसद विघटन गर्नुको कारण आदेश जारी गरेको छ । प्रधानन्यायाधीश चोलेन्द्र शमशेर राणा नेतृत्वको संवैधानिक इजलासले आज यस्तो आदेश जारी गरेको हो ।
संसद विघटन गर्ने निर्णयका सम्बन्धमा सरकारका नाममा कारण देखाउ आदेश जारी गर्दै सर्वोच्चले मन्त्रीपरिषद्बाट भएको निर्णयको सक्कल प्रति, राष्ट्रपतिको निर्णयको सक्कल प्रतिका साथै संसदसँग सम्बन्धित आवश्यक कागजात पेश गर्न भनेको छ ।
यस्तै सर्वोच्चले नेपाल बार एशोसिएसन र सर्वोच्च अदालत बार एशोसिएसनसँग एमिकस क्युरी पनि माग गरेको छ । एमिकस क्युरी अदालतले इजलासलाई सहयोग गर्न बनाउने विज्ञहरुको टोली हो ।
सरकारले असंवैधानिक तवरबाट संसद विघटन गरेको दाबी गर्दै एक दर्जनभन्दा धेरै रिट निवेदन सर्वोच्चमा दायर भएका छन् ।
प्रधानन्यायाधीशसहित पाँच न्यायाधीशको इजलासले संसद विघटनविरूद्ध परेका दर्जन बढी मुद्दाको सुनुवाइ गरेको थियो ।
वकिलहरूले बहस सुनिसकेपछि इजलासको नेतृत्व गरेका प्रधानन्यायाधीश चोलेन्द्रशमशेर राणाले अन्तरकालीन आदेश दिन अस्वीकार गरेका छन् ।
