टीकापुर, कात्तिक १९
टीकापुर उद्योग वाणिज्य संघका निवर्तमान अध्यक्ष परशुराम चपाँईले नेपाल उद्योग वाणिज्य महासंघको खुल्ला केन्द्रिय सदस्य पदका लागि उम्मेदवारी दर्ता गराएका छन । उनी सुदूरपश्चिमबाट खुल्ला केन्द्रिय सदस्य पदका लागि उम्मेदवारी दर्ता गर्ने एक्लो व्यक्ति हुन । अहिलेसम्म अरु कसैको उम्मेदवारी दर्ता भएको छैन ।
युवावस्थामै टीकापुर उद्योग वाणिज्य संघको उपाध्यक्ष हुँदै अध्यक्ष पदको जिम्मेवारी सम्हालिसकेका चपाँई पछिल्लो समय सशक्त युवा व्यवशायीका रुपमा चिनिन थालेका छन । उनले सुदूरपश्चिमको आर्थिक गतिविधिलाई अझ बढी चलायमान बनाउन आफूले महासंघको खुल्ला केन्द्रिय सदस्य पदमा उम्मेदवारी दिएको बताए ।
उनले चन्द्र ढकाल प्यानलबाट उम्मेदवारी दर्ता गराएका हुन । महासंघको वरिष्ठ उपाध्यक्षका लागि ढकाल र किशोर प्रधान चुनावी मैदानमा होमिएका छन । महासंघको विधान अनुसार वरिष्ठ उपाध्यक्ष नै आगामी कार्यकालमा स्वतः अध्यक्ष बन्ने भएपछि वरिष्ठ उपाध्यक्ष सहितका पदमा चुनाव हुने भएको छ ।
वर्तमान अध्यक्ष भवानी राणाको कार्यकाल समाप्तीसँगै वरिष्ठ उपाध्यक्ष शेखर गोल्छा स्वतः अध्यक्ष बन्नेछन । त्यसपछिको कार्यकालमा अहिले वरिष्ठ उपाध्यक्षमा जित्ने व्यक्ति नै अध्यक्ष बन्नेछन ।
महासंघको ५४ औं साधारण सभा मंसिर ११ देखी १३ गतेसम्म काठमाण्डौंमा आयोजना हुने भएको छ । महासंघले १३ गते चुनावको मिति तोकेको छ भने मंसिर ४ गतेसम्म उम्मेदवारी दर्ता गर्न सकिने चुनावी तालिका छ ।
गत चैतमै महासंघको साधारण सभा हुनुपर्नेमा कोभिड–१९ का कारण सर्दै आएको हो । महासंघले साधारण सभाको मिति तोके पनि सरकारले गरेको लकडाउनका कारण स्थगित भएको थियो ।
दुईवटै प्यानलले उम्मेदवारी दर्ता सहित चुनावी अभियान सुरु गरेपछि खुल्ला तर्फका पदमा अरु कसैको उम्मेदवारी थपिने सम्भावना न्यून रहेको छ ।
