टीकापुर, कार्तिक १७
कैलालीको टीकापुर नगरपालिकाका नगर प्रमुख तपेन्द्र रावललाई कोरोना पुष्टि भएको छ ।
धनगढीस्थित सेती प्रादेशिक अस्पतालको ल्याबमा गरिएको परीक्षणमा रावललाई कोरोना संक्रमण पुष्टि भएको हो ।
नगर प्रमुख रावललाई सामान्य रुघाखोकी र केही दिन अघि ज्वरो आएको थियो । नगर प्रमुख रावलले आफ्नो फेसबुकमा आफूलाई कोरोना संक्रमण पुष्टि भएको उल्लेख गरेका छन् ।
रावलले लेखेका छन् ‘सावधानी अपनाउँदा अपनाउँदै पनि मलाई कोरोना पुष्टि भएको छ । हाल म घरमै आइसोलेसनमा बसिरहेको छु । यो अवधिमा मेरो सम्पर्कमा रहनु भएका सम्पूर्ण महानुभावहरुलाई सावधानी अपनाउनु हुन अनुरोध गर्दछु ।’
त्यस्तै नगरपालिकाका स्वास्थ्य शाखा प्रमुख बलबहादुर रावललाई समेत कोरोना पुष्टि भएको छ ।
कोरोना रोकथामका लागि फ्रन्ट लाइनमा खटिँदै आएका रावललाई कोरोना पुष्टि भएको हो । उनले समेत फेसबुकमा कोरोना संक्रमण पुष्टि भएको सार्वजनिक गरेका छन् ।
यसअघि नगर पालिकाका ६ जना कर्मचारीमा समेत कोरोना पुष्टि भएको थियो ।
