काठमाण्डौं, साउन २२
नेकपाका अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ निवासमा ड्युटीमा बसेका प्रहरीमा कोरोना देखिएको छ । प्रचण्डको सचिवालयका अनुसार ६ जना सुरक्षाकर्मीमा कोरोना देखिएको हो ।
‘निवासको सुरक्षामा खटिएका सुरक्षाकर्मीमा कोरोना पोजेटिभ भेटिएको हो’, सचिवालयले भनेको छ–‘उहाँलाई स्कर्टिङ गर्ने सुरक्षाकर्मीमा भने कोरोना नेगेटिभ भेटियो ।’
प्रचण्ड निवासका सुरक्षाकर्मीहरूको नेपाल प्रहरी अस्पताल महाराजगञ्जमा कोरोना जाँच गरिएको थियो ।
त्यस्तै प्रधानमन्त्री केपी शर्मा ओली समेत कोरोना संक्रमितको सम्पर्कमा रहेको भेटिएको छ । प्रदेश २ का आन्तरिक मामिला तथा कानुनमन्त्री ज्ञानेन्द्रकुमार यादवमा कोरोना भाइरस संक्रमण पुष्टि भएको छ । प्रधानमन्त्री ओली उनको सम्पर्कमा रहेको पाईएको छ ।
मन्त्री यादव साउन १४ प्रहरी समायोजन सम्बन्धी समन्वय समितिको बैठकमा सहभागी हुन काठमाडौं आएका थिए । समितिमा रहेका प्रदेशका आन्तरिक मामिला तथा कानूनमन्त्रीहरु, संघीय सरकारका गृहमन्त्री रामबहादुर थापा लगायतले बालुवाटार पुगेर प्रधानमन्त्रीसँग छलफल गरेका थिए ।
स्वास्थ्य तथा जनसंख्या मन्त्रालयले जारी गरेको टेस्टिङ गाइडलाइन अनुसार संक्रमितसँग सम्पर्कमा आएका व्यक्ति सम्भावित संक्रमित हुन् र उनीहरुको पीसीआर विधिबाट कोरोना संक्रमण परीक्षण गर्नुपर्छ ।
मन्त्री यादवले साउन १९ गते स्वाब दिएका थिए । उनीसँगै चालक, व्यक्तिगत सुरक्षा गार्ड (पीएसओ), अंगरक्षक र सशस्त्र प्रहरीका एक जवानमा कोरोना संक्रमण पुष्टि भएको छ ।
फोटो: प्रदेश २ का आन्तरिक मामिलामन्त्री ज्ञानेन्द्र यादवसहित प्रधानमन्त्री केपी शर्मा ओली । साभारः अनलाइन खबर
