टीकापुर, साउन २०
एकजना पास्टर (क्रिश्चियन गुरु) ले ज्यूदो फर्काउने भनेपछि टीकापुर नगरपालिका–१ शक्तिनगर शिविरका इश्वर डगौराले आफ्ना मृत बुवाको शव केही दिन देखी घरभित्रै राखेको पाईएको छ ।
छिमेकीले शव गन्हाएको खबर दिएपछि प्रहरी पुग्दा सो घटना बाहिरिएको हो । इलाका प्रहरी कार्यालय टीकापुरका डिएसपी मधुसुदन न्यौपानेले घरभित्र ४३ वर्षका मोतिराम डगौराको शव भेटिएको जानकारी दिए ।
उनका अनुसार स्थानीय पास्टर दीपक चौधरीले सात दिन भित्र बचाउने भनेपछि मृतकको शव घरभित्रै राखेको पाईएको छ । मृतकका छोरा इश्वरले सात दिनमा बुवा बाँच्ने भनेपछि शव घरभित्रै राखेको प्रहरीसँग बताएका छन । मृतकको शव पास्टर चौधरीको घरभित्र भेटिएको छ । उनलाई केही दिन अघि उपचारका लागि त्यहाँ लगेको पाईएको प्रहरीले जानकारी दिएको छ ।
प्रहरीका अनुसार उनको केही दिन अघि नै मृत्यु भैसकेको जस्तो देखिन्छ । उनको शव सडेको अवस्थामा भेटिएको छ । प्रहरीले शव पोष्टमार्टमका लागि टीकापुर अस्पतालमा पु¥याएको छ ।
डिएसपी न्यौपानेले घटनाका बारेमा सोधपुछ गर्न मृतकका छोरा सहित चार जनालाई नियन्त्रणमा लिएको बताए । उनले घटनाको प्रारम्भिक अनुसन्धान भैरहेकाले थप कुरा जानकारीमा नआएको बताए ।
