टोप प्रकाश वि.क.
टीकापुर, जेठ १४
नेपाल पत्रकार महासंघ सुदूरपश्चिम प्रदेश समितिले सात पहाडी जिल्लाका सञ्चारकर्मीहरुलाई स्वास्थ्य सामाग्री वितरण गर्नुका साथै पछिल्लो अवस्थाका बारेमा जानकारी लिएको छ । प्रदेश अध्यक्ष अर्जुन शाहको नेतृत्वमा सातवटै जिल्लामा पुगेको टोलीले सञ्चारकर्मीहरुसँग अन्तरक्रिया समेत गरेको छ ।

अन्र्तक्रियाका क्रममा सञ्चारकर्मीहरुले कोरोनाको महामारी रोक्नका लागि भैरहेको लकडाउनका कारण पत्रकारिता निकै समस्या रहेको बताए । उनीहरुले प्राय सबै पत्रपत्रिकाहरु बन्द रहेको र रेडियो समस्याका बाबजुद सञ्चालन भैरहेको सुनाए ।

सञ्चारकर्मीहरुले रेडियोको लाइसेन्स नविकरण, विद्युत महशुस, टेलिफोन महशुल मिनाहाका लागि पहल गरिदिन आग्रह गरेका छन ।

सञ्चारकर्मीका गुनासा सम्बोधन गर्दैै प्रदेश अध्यक्ष शाहले आवश्यक पहल गर्ने प्रतिवद्धता व्यक्त गरे । उनले सञ्चारकर्मीको स्वास्थ्य बीमा एक साता भित्रै गरिने जानकारी दिए । ‘सबै सञ्चारकर्मीको एक साताभित्रै स्वास्थ्य बीमा हुन्छ’ उनले भने–‘यसका लागि सामान्य प्रावधान राखिने छन ।’

उनले सबै जिल्लाका रेडियो र पत्रपत्रिकालाई सुदूरपश्चिम प्रदेश सरकारले उपलब्ध गराएको राहत प्याकेज जिल्ला शाखाहरु मार्फत वितरण गर्ने तयारी भैरहेको जानकारी दिए । उनले राहत प्याकेज वितरणका लागि जिल्लामा अवस्थित रेडियो र पत्रपत्रिकाको विवरण संकलनको काम भैरहेको बताए ।

सोही टोलीमा रहेका प्रदेश समितिका महासचिव योगेश रावलले समाचार संकलन लगायतका क्रममा सञ्चारकर्मीले आफ्नो स्वास्थ्य अवस्थालाई ध्यानमा राख्नुपर्ने बताए । उनले आफू सुरक्षित भएर मात्रै समाचार संकलनका काममा खटिन सञ्चारकर्मीहरुलाई आग्रह गरे ।

उनले सञ्चारकर्मीको सानो लापरवाहीले समग्र पत्रकारीता क्षेत्रले नै क्षति पुर्याउने खालका कुनै काम गर्न नहुने बताए । ‘हामी समाजका लागि उदाहरणिय पात्र हौ । जसले गर्दा हामीबाट कुनै गलत काम हुनु हुँदैन’ उनले भने–‘हामी माथि समाजको ठूलो भरोसा रहेको हुन्छ ।’

अध्यक्ष शाहले सबै जिल्ला शाखा मार्फत स्वास्थ्य सामाग्री वितरण गरेका छन । प्रदेश समितिले पत्रकारहरुलाई एन ९५ मास्क, सर्जिकल मास्क, सेनिटाइजर र पंजा लगायतका स्वास्थ्य सामाग्री प्रदान गरेको हो ।
प्रदेश समितिलाई सबै जिल्ला शाखाहरुले संक्रमणकालिन अवस्थामा स्वास्थ्य सामाग्री प्रदान गर्नुका साथै जिल्लाको अवस्थाका बारेमा जानकारी लिएकोमा धन्यवाद व्यक्त गरेका छन ।