धनगढी, वैशाख १३
सुदूरपश्चिम प्रदेश सरकारले अछामको साँफेबगर आगलागी घटनाका पीडित परिवारलाई राहत सहयोगका लागि १० लाख रुपियाँ दिने निर्णय गरेको छ ।

मानवीय राहत स्वरूप पीडित परिवारका लागि तत्कालै १० लाख रुपैयाँ सहयोग गर्ने निर्णय गरेको मुख्यमन्त्री कमलबहादुर शाहले शनिबार पत्रकार सम्मेलन गरी जानकारी दिए । उनले सहयोग रकम सम्बन्धितलाई नियमानुसार उपलब्ध गराउनका लागि साँफेबगर नगरपालिकामा पठाउने निर्णय भएको उल्लेख गरे ।

शनिबार बिहान ३ बजेदेखि लागेको आगो सुरक्षा निकाय, स्थानीयको प्रयासमा बिहान ६ बजे नियन्त्रणमा आएको जनाइएको छ । आगलागीबाट १० परिवारको घर, पसल जलेर ध्वस्त भएको प्रारम्भिक विवरण आएको मुख्यमन्त्री शाहको भनाइ थियो ।

उनले तीन करोड ८६ लाख रुपियाँ बराबरको क्षति भएको खबर आएको उल्लेख गर्दै भने ‘क्षति विस्तृत विवरण आएपछि थप अन्य सहयोग गर्न प्रदेश सरकार तयार छ ।’ 

केही हप्ता अगाडि मात्रै अछामकै बान्नीगढी जयगढ गाउँपालिकास्थित जयगढ बजारमा भिषण आगलागी भएको थियो । आगलागी लगायत विभिन्न विपद्का घटना घटिरहेकाले सबैलाई सतर्क रहन मुख्यमन्त्री शाहले आग्रह गरेका छन् ।