टीकापुर, चैत २१
टीकापुर बहुमुखी क्याम्पसमा यही २७ गते हुने स्वतन्त्र विद्यार्थी युनियनको निर्वाचनमा नेविसंघ एक्लै पाँच विद्यार्थी संगठनको संयुक्त प्यानलसँग भिड्ने तयारीमा छ । 

संयुक्त प्यानलमा संघीय सरकारको नेतृत्व गरिरहेको नेकपा एमाले, प्रतिपक्षी नेकपा माओवादी केन्द्र र नेकपा समाजवादीका साथै नागरिक उन्मुक्तिको विद्यार्थी संगठन र विप्लव निकट विद्यार्थी संगठन समेत आवद्ध छन । उनीहरुले नेविसंघ विरुद्ध संयुक्त प्यानल खडा गरेका छन । 

प्यानलको नेतृत्व अनेरास्ववियुका गोविन्दप्रसाद भण्डारीले गरेका छन । उनलाई प्यानलले अध्यक्ष पदको उम्मेदवारका रुपमा अघि सारेको छ । त्यस्तै सचिवमा नागरिक विद्यार्थी समाजका आशिष चौधरी र कोषाध्यक्षमा अखिल क्रान्तिकारीका सुदिप नेपाल उम्मेदवार रहेका छन । 

पाँच विद्यार्थी संठगनसँग एक्लै भिडेर जीत निकाल्ने तयारीमा रहेको नेविसंघले अध्यक्षमा किरण साउँद, सचिवमा छविलाल न्यौपाने र कोषाध्यक्षमा डिम्पल चौधरीलाई अघि सारेको छ । 

स्ववियु निर्वाचन समितिका अनुसार एकजना देवाशिष जंग थापाले अध्यक्षमा स्वतन्त्र उम्मेदवारी दर्ता गरेका छन । उनले एमालेको विद्यार्थी संगठन अनेरास्ववियुबाट विद्रोह गरेर स्वतन्त्र उम्मेदवारी दर्ता गरेको बताईएको छ । उनले अनेरास्ववियुका केही मत आफूतिर ताने नेविसंघलाई जित्न सहज हुने विश्लेषण छ ।

त्यस्तै आठ जना सदस्यका लागि नेविसंघ एक्लैले आठजनाको उम्मेदवारी दर्ता गरेको छ भने संयुक्त प्यानलले भागबण्डा गरेर उम्मेदवारी दर्ता गरेका छन । नेविसंघका तर्फबाट समिक्षा शाही, कुशल जैशी, शिशिर तिरुवा, आस्मा चौधरी, इसान लम्साल, मनोज धामी, अनुषा कुमारी चौधरी र शिशिर रावलले सदस्य पदमा उम्मेदवारी दर्ता गरेका छन । 

संयुक्त प्यानलका तर्फबाट सदस्य पदमा अनेरास्ववियुका अनमोल खड्का, जुनाकुमारी चौधरी डगौरा, सपना रावलको उम्मेदवारी परेको छ । त्यसैगरी अखिल क्रान्तिकारीका जोती सुनार, रिमाकुमारी चौधरी, नागरिक विद्यार्थी समाजका अन्जिना चौधरी, अनु चौधरी र अखिल नेपाल स्वतन्त्र विद्यार्थी युनियन समाजवादीका पल्लवी विकको समेत सदस्य पदमा उम्मेदवारी दर्ता भएको निर्वाचन समितिले जारी गरेको सूचनामा उल्लेख छ । 

निर्वाचनमा समानुपातिकतर्फ चारवटा विद्यार्थी संगठन दर्ता भएका छन । जसमा नेपाल विद्यार्थी संघ, अखिल क्रान्तिकारी, अनेरास्ववियु र नागरिक विद्यार्थी समाज रहेको निर्वाचन समिति सदस्य डा. धनकृष्ण उपाध्यायले जानकारी दिएका छन । उनका अनुसार निर्वाचनमा १ हजार ५८५ मतदाताले मतदान गर्नेछन । 

सो क्याम्पसमा हालसम्म नेविसंघले नै जित्दै आएको छ । नेविसंघ आफ्नो दबदबा कायम राख्न चाहन्छ भने अन्य विद्यार्थी संगठन मिलेर आफ्नो विजयी सुरुवात गर्न चाहन्छन ।