टीकापुर, चैत्र २०
‘मर्यादित सहकारीः समुन्नत समाज’ भन्ने मूलनाराका साथ आज ६८ औं सहकारी दिवस देशभर विभिन्न कार्यक्रम गरी मनाइँदै छ । नेपालमा २०१३ साल चैत २० गते पहिलो सहकारी स्थापना भएको हो ।

राणा प्रधानमन्त्री जुद्ध शमशेरले २००० मै सहकारीको स्थापना प्रयास गरेको भनिए पनि चितवनमा स्थापना भएको बखान सहकारीलाई नै नेपालको पहिलो सहकारी मानिन्छ ।

टीकापुर नगरपालिकाले पालिकामा रहेका सहकारीहरुको सहभागितामा सहकारी दिवस मनाएको छ । मर्यादित सहकारी बनाउन र आर्थिक खम्बाको रुपमा रहेको सहकारीलाई समाजसँग जोड्नका लागि सहकारी दिवस मनाइएको नगरपालिकाले जनाएको छ ।

नगरपालिका केन्द्रबाट शुरु भएको प्रभातफेरि कार्यक्रम टीकापुर बजार परिक्रमा गर्दै सभामा परिणत भएको थियो । कार्यक्रमलाई सम्बोधन गर्दै नगर प्रमुख रामलाल डगौरा थारुले देशका अन्य भागमा सहकारीहरु बद्नामित भइरहेको भए पनि टीकापुरमा त्यो अवस्था नरहेको बताए ।

‘अन्य ठाउँमा सहकारीहरु बद्नामित भइरहेका घटना सुनिरहेका छौं, टीकापुरमा त्यस्तो घटना सुनिएको छैन’ नगर प्रमुख थारुले भने ‘सहकारीप्रतिको नागरिकको विश्वास जित्न आगामी दिनमा समेत बद्नामित हुन नदिनेतर्फ सबै सचेत हुन जरुरी छ ।’

कार्यक्रममा नगरपालिकाका प्रमुख प्रशासकीय अधिकृत दमनसिंह चौधरी, महिला जागरण बहुउद्देश्यीय सहकारी संस्थाका अध्यक्ष शोभा शर्मा ज्ञवाली, जनकल्याण बचत तथा ऋण सहकारीका व्यवस्थापक छवीलाल जैशी, नगरपालिकाको राजश्व शाखा प्रमुख नन्दबहादुर केसीले बोलेका थिए भने कार्यक्रमको सञ्चालन आर्थिक विकास शाखा प्रमुख रञ्जु आचार्यले गरेकी थिइन् ।