धनगढी, चैत १९
सूचनाको सहज पहुँच आम नागरिकसम्म हुनुपर्नेमा एक कार्यक्रमका सरोकारवालाहरुले जोड दिएका छन् । राष्ट्रिय सूचना आयोग, काठमाडौंले धनगढीमा आज आयोजना गरेको सूचनाको हक सम्बन्धी प्रदेशस्तरीय अन्तरक्रिया कार्यक्रमका सहभागीहरुले चुस्त र दुरुस्त रुपमा सूचनाको पहँुच आम नागरिकसम्म पुग्नु पर्नेका जोड दिएका हुन् ।
हरेक नागरिकले सार्वजनिक सरोकारका विषयमा सूचना पाउनु संबैधानिक हक भएकाले नागरिकमा सहजरुपमा सूचनाको पहुँच हुनु पर्नेमा उनीहरुले जोड दिएका हुन् ।
कार्यक्रममा बोल्दै सुदूरपश्चिम प्रदेश सरकारका अन्तरिक मामिला तथा कानुन मन्त्री हिरा सार्कीले सुदूरपश्चिम प्रदेश सरकार सूचनाको हक सुनिश्चित गर्नका लागि क्रियाशील रहेको बताए । मन्त्री सार्कीले कानुन नै निर्माण गरेर सूचनालाई सहज रुपमा आम जनतासम्म पुगाउने कार्यमा प्रदेश सरकार लागिपरेको बताए ।
राष्ट्रिय सूचना आयोगका प्रमुख आयुक्त डा. सुरेशप्रसाद आचार्यले दिन मिल्ने र मागेको सूचना नदिने अधिकारीलाई कानुन अनुसार कारवाही हुने भएकाले हरेक कार्यालयका अधिकारीले विषयबस्तुको जानकारी सहित सजग हुनु आवश्यक रहेको बताए ।
आयुक्त आचार्यले भने ‘सूचना आयोग हरेक नागरिकको सूचनाको हक सुनिश्चित गर्न क्रियाशील छ, सूचना लिने दिने परम्पराको विकासले सुशासन कायम गर्न सहज हुनेछ ।’
सूचनाको सहजताका लागि हरेक प्रदेश सरकार र पालिका क्रियाशिल हुनुपर्नेमा आचार्यले जोड दिए । आयोगको स्थापनापछि सूचनाको हक स्थापति गर्न पहिलो पटक सरकारी कार्यालयका अधिकारीसँग अन्तरक्रिया गरिएको समेत आयुक्त आचार्यको दाबी छ ।
कार्यक्रममा कैलालीका प्रमुख जिल्ला अधिकारी गोगनबहादुर हमालले अन्य कार्यालय भन्दा स्थानीय तहमा सूचना पाउन कठिन भएको अनुभब ब्यक्त गरे ।
कार्यक्रममा सहभागी विभिन्न सरकारी कार्यालयका अधिकारीहरुले सूचना अधिकारीलाई साधन स्रोत र अधिकारका सबालमा बलियो बनाउनु पर्नेमा जोड दिएका थिए ।
-1729233105.jpeg)
