टीकापुर, चैत्र १९
एक किशोरीसहित छ जना युवक कैलालीका विभिन्न स्थानबाट लागुऔषधसहित पक्राउ परेका छन् ।

जिल्ला प्रहरी कार्यालय कैलालीले दिएको जानकारी अनुसार टीकापुर नगरपालिका वडा नं. ९ खक्रौला सडक खण्डबाट बर्दियाको राजापुर नगरपालिका वडा नं. १ हिमालिपुरका २३ वर्षीय पारस थारुलागूऔषधसहित पक्राउ परेका छन् । 

थारुलाई १ ग्राम २६० मिलिग्राम खैरो हेरोइनसहित इलाका प्रहरी कार्यालय टिकापुर, कैलालीबाट खटिएको प्रहरी टोलीले नियन्त्रणमा लिएको हो ।

त्यस्तै धनगढी उपमहानगरपालिका वडा नं. १५ कनरीमा सुदूरपश्चिम प्रदेश ०१–०१० प ९००९ नम्बरको मोटरसाइकललाई चेकजाँच गर्दा चालक वडा नं. ७ का २७ वर्षीय सुरेश राना र मोटरसाइकल पछाडी सवार  वडा नं. १५ उर्मीका २६ वर्षीय बलबुध राना पक्राउ परेका हुन् ।

पक्राउ परेका दुबै जनाको साथबाट ११० मिलिग्राम खैरो हेरोइन फेला पारी उक्त पदार्थ, मोटरसाइकलसहित प्रहरी चौकी कनरीबाट खटिएको टोलीले नियन्त्रणमा लिएको हो ।

यसैगरी लम्कीचुहा नगरपालिका वडा नं. १ लम्की बजारबाट सोही ठाउँका ३७ वर्षीय पूर्णदिप शर्मा उपाध्याय र ३२ वर्षीय नारायण कार्की पक्राउ परेका छन् ।

उपाध्याय र कार्की दुबै जनाको साथबाट ३३० मिलिग्राम खैरो हेरोइन, ट्रामाडोल १० ट्याब्लेट र नाइट्राभेट १ ट्याब्लेट फेला पारी इलाका प्रहरी कार्यालय लम्कीबाट खटिएको प्रहरी टोलीले नियन्त्रणमा लिएको हो ।

यस्तै धनगढी उपमहानगरपालिका वडा नं. ८ भगत चोकबाट सोही ठाउँका २५ वर्षीय चंचल कुमार राना र  वडा नं. १ का १९ वर्षीया किशोरी काजँल पार्कीलाई ६० मिलिग्राम लागूऔषध खैरो हेरोइनसहित जिल्ला प्रहरी कार्यालय कैलालीबाट खटिएको प्रहरी टोलीले नियन्त्रणमा लिएको छ ।

विभिन्न स्थानबाट पक्राउ परेका सातै जनामाथि थप अनुसन्धान भइरहेको प्रहरीले जनाएको छ ।