टीकापुर, चैत १५
टीकापुर नगरपालिकाले पूरानै अनुगमन तथा सुपरिवेक्षण समितिले तयार पारेको कागजातकै आधारमा विमानस्थल मर्मतको भुक्तानी गरेको पाईएको छ । 

मेयर रामलाल डगौरा थारुले समितिका संयोजक दिपक बहादुर निशानीले अनुगमन नगरेका कारण भुक्तानीमा समस्या भएको भन्दै संयोजक निशानीलाई जिम्मेवारीबाट हटाएका थिए । मेयर थारुले निशानीको ठाउँमा कार्यपालिका सदस्य कैलाशपति चौधरीलाई जिम्मेवारी तोकेका छन । 

उपमेयर खडकबहादुर शाह निलम्वनमा परेपछि अनुगमन तथा सुपरिवेक्षण समितिको संयोजक कार्यपालिका सदस्यहरुबाट बनाउने गरिएको छ । 

नगरपालिकाले २०८१ माघ १२ गते समितिले बुझाएको प्रतिवेदनका आधारमा रकम भुक्तानी गरेको पाईएको छ । स्रोतका अनुसार नगरपालिकाले २०८१ फागुन १५ गते ५ लाख ८१ हजार २५८ रुपैयाँ भुक्तानी गरेको छ । 

समितिले बुझाएको प्रतिवेदनमा आयोजनाको नाम वडा नं. १ स्थित टीकापुर विमान स्थलको धावन मार्ग मर्मत सुधार कार्य र एयरपोर्टको धावनमार्ग प्रयोग गरी चलन चल्तीमा रहेको बाटो बन्द गर्ने काम उल्लेख छ । 

प्रतिवेदनले आयोजनाको कुल लागत ६ लाख ५० हजार र कुल प्राविधिक मुल्यांकन रकम ६ लाख ४० हजार १७८ रुपैयाँ भएपनि भुक्तानीका लागि भने ५ लाख ८१ हजार २५९ रुपैयाँ १८ पैसा सिफारिस गरेको छ । 

त्यस्तै संयोजक निशानीको अध्यक्षता भएको समितिको बैठकमा आयोजनाको सम्पूर्ण काम स्विकृत लागत अनुमान बमोजिम नै सन्तोषजनक रुपमा  सम्पन्न भएकोले भुक्तानीका लागि सिफारिस गर्ने निर्णय समेत भएको पाईएको छ । सो बैठकमा विशेष आमन्त्रितका रुपमा मेयर थारुको समेत उपस्थिति रहेको देखिन्छ । 

२०८१ माघ १२ गते बिहान ९ बजे स्थलगत अनुगमन भएको र सोही दिन दिउसो १ बजे बैठक बसेर निर्णय सहित समितिले नगरपालिकालाई प्रतिवेदन बुझाएको छ । 

मेयर थारुले भने संयोजक निशानीले काम नगरेको भन्दै जिम्मेवारीबाट हटाईएको भन्दै आएका छन । संयोजक निशानीले आफ्नो बद्नाम गर्न मेयर थारुले गलत हल्ला फैलाएको बताए ।

उनले अनुगमन पश्चात आफूले दिएको प्रतिवेदनका आधारमा भुक्तानी गर्ने तर अनुगमन नै नगरेको भन्दै हल्ला गर्नु बदनाम गर्ने नियत भएको बताए ।