टीकापुर, चैत ११
कैलालीका विभिन्न पाँचवटा पालिकाका ४२० जना अभिभावकलाई सकारात्मक अभिभाकत्व तालिम प्रदान गरिएको छ । वल्र्डभिजन इन्टरनेसनल नेपालको आर्थिक सहयोगमा बाल कल्याण संघ टीकापुरले तालिम प्रदान गरेको छ । 

तालिमबाट कैलालीका टीकापुर, भजनी, घोडाघोडी, गौरीगंगा नगरपालिका र कैलारी गाउँपालिकाका अभिभावक लाभान्वित भएका छन । उनीहरुले तालिममा सिकेका कुरा निकै ज्ञानवद्र्धक भएको बताएका छन । 

तालिममा कसरी असल अभिभावक बन्ने, कसरी बालबालिकाको मनोविज्ञान बुझेर व्यवहार गर्ने जस्ता कुरा सिकाउने गरिएको बाल कल्याण संघ टीकापुरकी कौशिला चौधरीले बताईन । उनले तालिम पश्चात अभिभावक र बालबालिकाकाबीच मित्रवत व्यवहार देखा परेको जानकारी दिईन । 

तालिम पश्चात अभिभावकले मित्रवत व्यवहार गर्न थालेपछि बालबालिकामा समेत सकारात्मक प्रभाव परेको छ । उनीहरु आफ्ना अभिभावकसँग मात्रै नभई अन्य व्यक्तिहरुसँग समेत खुलेर कुरा गर्न थालेका छन । 

बालबालिकामा आएको सकारात्मक परिवर्तनले उनीहरुको शिक्षादिक्षामा समेत परिवर्तन देखा परेको छ । उनीहरु विद्यालयमा समेत खुलेर कुरा राख्न सक्ने भएका छन । 

टीकापुर नगरपालिका वडा नम्बर ६ नारायणपुरमा यस्तै तालिम सम्पन्न भएको छ । सो तालिममा २५ जना अभिभावकको सहभागिता रहेको थियो । जसमा २३ जना महिला र २ जना पुरुष रहेका छन ।