टीकापुर, माघ ११ 
कैलालीको जानकी गाउँपालिकाले एक सामुदायिक वनको जग्गामा जबर्जस्ती स्मार्ट शौचालय बनाउन शुरु गरेपछि सव डिभिजन वन कार्यालय टीकापुरले निर्माण कार्यमा रोक लगाएको छ । 

वडा नं. ३ को सुवर्ण सामुदायिक वनको जग्गामा रहेको खेलमैदानमा मन्त्रालयको अनुमति विना नै पालिकाले एक करोड बढीको लागतमा स्मार्ट शौचालय बनाउन थालेपछि वन कार्यालयले निर्माण कार्यमा रोक लगाएको हो । 

सव डिभिजन वन कार्यालय टीकापुरका प्रमुख दिलिप यादवका अनुसार गाउँपालिकाले जबर्जस्ती अनुमति विना नै निर्माण थालेपछि निर्माण कार्यमा रोक लगाएको बताए । विश्व बैंकको आर्थिक सहयोगमा पालिकाले वनको जग्गामा स्मार्ट शौचालयसहित डेस च्याजिंग रुम आदि निर्माण गर्न शुरु गरेको थियो । 

वनको जग्गामा कुनै संरचना निर्माण गर्दा भूमि सुधार मन्त्रालयले भोगाधिकारको अनुमति दिनुपर्ने नियम भए पनि पालिका हालै सम्पन्न गाउँ सभाबाट स्मार्ट शौचालय निर्माण गर्ने निर्णय गरेको थियो । 

निर्माण कार्य रोकेपछि गाउँपालिका अध्यक्ष गणेश चौधरीले खेल मैदानमा खेलाडीहरुका लागि आवश्यक शौचालय बनाउँदा अवरोध गर्नु उपयुक्त नभएको जिकिर गरे ।

'वर्षौंदेखि खेलमैदानका रुपमा रहेको खाली जग्गामा खेलमैदान हुँदा भोगाधिकार नचाहिने ?' अध्यक्ष चौधरीले भने 'खेलाडीका लागि शौचालय बनाउँदा अवरोध सिर्जना हुनु दुःखद् हो । हाम्रो भनाई खेल मैदानमा शौचालय बन्न दिनुपर्छ भन्ने हो ।' 

स्थानीयले पालिकाले अनुमति बिना नै शौचालय निर्माण शुरु गरेपछि वन कार्यालयमा उजुरी दिएका थिए ।