टीकापुर, माघ २
कैलालीको जानकी गाउँपालिका वडा नं. ६ का वडाध्यक्ष इन्द्र चौधरीले एक ४२ वर्षीय पुरुषमाथि कुटपिट गरेका छन् । वडाध्यक्ष चौधरीले जगतपुरका ४२ वर्षीय अमर बुढामगरलाई कुटपिट गरेका हुन् ।

वडाध्यक्ष चौधरीको कुटपिटबाट बुढामगरको बाँया खुट्टाको घुँडामुनि दुई ठाउँमा भाँच्चिएको छ । सामान्य मजदुरी गरेर जीविकोपार्जन गर्दै आएका बुढामगर माथि मदिराले मात्तिएका वडाध्यक्ष चौधरीले दाउराको चिर्पटले हानेर खुट्टा भाँचेका हुन् । 

पीडित बुढा मगरका अनुसार वडाध्यक्ष चौधरीलाई ‘वडाध्यक्षज्यू अचेल गाउँतिर देखिनु हुन्न नि’ भनेर सोधेपछि वडाध्यक्ष चौधरीले चिर्पटले हिर्काएका थिए । घाइते भएका बुढामगरलाई वडाध्यक्षले घाइते अवस्थामा नालीमा फालेर हिँडेको स्थानीयहरुले बताएका छन् ।  

यता, इलाका प्रहरी कार्यालय टीकापुरका प्रमुख डिएसपी नवीनराज बुढाथोकीले वडाध्यक्ष चौधरीले कुटपिट गरेको विषयमा कारवाहीको माग गर्दै निवेदन आएको बताए । ‘बुढामगरमाथि कुटपिट भएको भन्दै कार्यालयमा पीडितका तर्फबाट निवेदन आएको छ’ डीएसपी बुढाथोकीले भने ‘हामीले वडाध्यक्षलाई छलफलका लागि बोलाएका छौं, घाइते बुढामगरको टीकापुर अस्पतालमा उपचार भइरहेको छ ।’

घटनाबारे जानकारी लिन वडाध्यक्ष चौधरीलाई उनको मोबाइल नम्बर ९८५८४२१४७१ मा पटक पटक सम्पर्क गर्दा समेत सम्पर्क हुन सकेन । 

नागरिक उन्मुक्ति पार्टीबाट वडाध्यक्षमा निर्वाचित चौधरीले यसअघि समेत स्थानीय माथि अभद्र व्यवहार गरेपछि स्थानीयले उल्टै कुटपिट गरेको घटना सार्वजनिक भएको थियो ।