कालिकोट, पौष १३
कर्णाली नदीमा डोजर पल्टिँदा एक जना बेपत्ता भएका छन् । कालीकोटको पचालझरना गाउँपालिका वडा नं. ८ चाटेबगरबाट वडा नं. ४ को जारकोटस्थित कर्णाली नदीमा डोजर तार्ने क्रममा शुक्रबार साँझ डोजर पल्टिँदा डोजरसहित सहचालक नदीमा बेपत्ता भएका हुन् ।

पचालझरना गाँउपालिका वडा नं. ८ चाटेबगरदेखि पचालझरना वडा नं. ४ जारकोट जाने क्रममा कर्णाली नदीमा डोजर पल्टिएको थियो । डोजरसहित एक जना बेपत्ता भएको र डोजर चालक नदीमा तैरिरहेको अवस्थामा प्रहरी र स्थानीयले उद्धार गरेको पचालझरना गाउँपालिका उपाध्यक्ष अल्किना बमले जानकारी दिए ।

जिल्लाको खाँडाचक्र नगरपालिका वडा नं. ८ का डोजर चालकको सकुशल उद्धार गरिएको र एक जना बेपत्ता भएको जिल्ला प्रहरी कार्यालय कालीकोटका सूचना अधिकारी गोविन्द चौधरीले बताए ।