टीकापुर, पौष २
कैलालीको बर्दगोरियामा आयोजित जिल्लाव्यापी छात्र÷छात्रा विद्यालयस्तरीय फुटबल प्रतियोगिताको उपाधीमाथि टीकापुरका दुईवटा विद्यालयले कब्जा जमाएका छन् । 

प्रतियोगिताको उपाधीमा टीकापुरस्थित खड्ग मेमोरियल इंग्लिस बोर्डिङ स्कुलले छात्रतर्फ र कर्णाली माध्यमिक विद्यालय, टीकापुरले छात्रातर्फको उपाधी उचालेका हुन् । 

बर्दगोरिया स्पोर्ट्स एण्ड इभेन्टसको आयोजनामा मंसिर २१ गतेदेखि सञ्चालित प्रतियोगितामा छात्रतर्फ भएको फाइनल खेलमा खड्ग मेमोरियलले घोडाघोडी नगरपालिका देउकलियास्थित राष्टिय माध्यमिक विद्यालयलाई ३-२ गोलअन्तरले पराजित गर्दै उपाधी कब्जा गरेको हो ।

विद्यालयका प्रधानाध्यापक हिरण्य शर्माले दिएको जानकारी अनुसार खड्ग मेमोरियलका लागि आशिष बोहरा र सुशान्त वि.क.ले एक एक गोल गरेका हुन् भने राष्टिय मा.वि.का खेलाडीबाट एक गोल सुसाइट हुन पुगेको थियो । छात्रतर्फ जिल्लाका ३२ वटा विद्यालयहरुको सहभागिता रहेको थियो । 

छात्रातर्फ आजै सम्पन्न भएको फाइनल खेलमा टीकापुरस्थित माउण्ट सैपाल इन्टरनेशनल एकाडेमीलाई टाइबे्रकरमा रोक्दै टीकापुरकै कर्णाली माध्यमिक विद्यालयले उपाधी उचालेको हो ।

निर्धारित समयमा दुबै विद्यालयले कुनै पनि गोल गर्न नसकेपछि खेल टाइब्रेकरमा पुगेको थियो । खेलअवधिभर निकै प्रतिस्पर्धी रहेको माउण्ट सैपालले टाइब्रेकरमा कर्णालीले ४-३ गोलअन्तरले पराजित गर्दै उपाधी उचालेको हो । छात्रातर्फ १६ वटा विद्यालयले प्रतियोगितामा सहभागिता जनाएका थिए । 

छात्रतर्फ उपाधी बिजेता खड्ग मेमोरियलले ५१ हजार नगद, प्रमाणपत्र, टफी पुरस्कार प्राप्त गरेको छ । विद्यालयका खेलाडी नितेश रावल बेस्ट डिफेन्स र शिक्षक हेमराज क्षेत्री बेस्ट कोचका रुपमा पुरस्कृत भएका छन् । 

उता, छात्रातर्फ उपाधी बिजेता कर्णालीले समेत नगद रु. ५१ हजार रुपैयाँसहित प्रमाणपत्र, टफी पुरस्कार प्राप्त गरेको विद्यालयका प्रधानाध्यापक धर्मराज शर्माले जानकारी दिए ।