टीकापुर, कार्तिक २९
आगामी मंसिर १६ गते हुने जिल्ला समन्वय समिति कैलालीको निर्वाचनमा नेपाली काँग्रेसले अध्यक्षका लागि आफ्नो पार्टीबाट टीका चौधरी भुललाई उम्मेदवार बनाउने निणर्य गरेको छ ।
काँग्रेसको पार्टीको बैठकले जिल्ला समन्वय समितिका अध्यक्षको उम्मेदवारका लागि भुलको नाम सिफारिस गर्ने निणर्य गरेको हो । कार्य समितिको बैठकले उम्मेदवारीका लागि उनको एकल नाम सर्वसम्मतले सिफारिस गरेको जिल्ला उपसभापति खेमराज डंगौराले जानकारी दिए ।
जिल्ला समन्वय समिति कैलालीका तत्कालीन अध्यक्ष पदम कलेलको २०७९ पुस २३ गते निधन भएपछि अध्यक्षको पद रिक्त रहेको छ ।
अध्यक्ष पदको उम्मेदवारका लागि सिफारिस हुनु भएका भुल कैलारी गाउँपालिका वडा नम्बर २ को वडा सदस्य हुन । नेपाली काँग्रेसबाट उनी दलित महिला सदस्यको रुपमा वडामा निर्वाचित भएकी हुन् ।
जिल्ला समन्वय समितिको निर्वाचनमा नेपाली काँग्रेस, नेकपा (एमाले)- नेकपा (माओवादी केन्द्र) र नागरिक उन्मुक्ति पार्टीबाट निर्वाचित पालिका अध्यक्ष एवं नगर प्रमुख र उपाध्यक्ष एवं उपप्रमुखले मतदान गर्न पाउने छन् ।
