टीकापुर, कार्तिक २७
टीकापुर अस्पतालमा उपचाररत बिरामीहरुका लागि रगतको अभाव देखिएपछि नेपाल तरुण दल क्षेत्र नं. १ कैलालीले आज रक्तदान कार्यक्रम गरेको छ । नेपाली काँग्रेसको युवा संगठन तरुण दलले पार्टी कार्यालयमा आयोजना गरेको रक्तदान कार्यक्रममा ४० पिन्ट रगत संकलन भएको हो ।
‘रक्तदान जिवनदान’ भन्ने मूल नाराका साथ टीकापुर अस्पतालमा केही दिन यता देखिएको रगतको अभावलाई कम गर्न तरुण दलले रक्तदान कार्यक्रम आयोजना गरेको क्षेत्रीय अध्यक्ष कल्पेश कुँवरले जानकारी दिए ।
झण्डै चार महिना अघि समेत रक्तदान कार्यक्रम आयोजना गरेको तरुण दलले रगतको अभावमा कुनै पनि बिरामीले उपचारमा समस्या भोग्न नपरोस् भन्नका लागि कार्यक्रम आयोजना गरेको अध्यक्ष कुँवरले जानकारी दिए । रक्तदान कार्यक्रममा तरुण दल, नेपाल विद्यार्थी संघ, पार्टीका नेता तथा कार्यकर्ताहरुले रक्तदान गरेका हुन् ।
नेपाल रेडक्रस सोसाइटी टीकापुर उपशाखाद्धारा सञ्चालित रक्त सञ्चार केन्द्रमा दैनिक ३० पिन्टसम्म रगतको माग हुँदै आएको छ । अस्पतालमा उपचाररत आउने बिरामी, अप्रेसन गर्नुपर्ने बिरामी तथा थारु समुदायमा देखिएको सिकलसेल एनिमियाका बिरामीहरुलाई रगत अभाव हुँदै आएको छ ।
रेडक्रस टीकापुरका सभापति दत्तबहादुर विष्टले रगतको अभाव कम गर्न अन्य विभिन्न संघ संस्थाहरुलाई रक्तदान कार्यक्रम राखेर सहयोग गर्न आग्रह गरेका छन् ।
