टीकापुर, कात्तिक १४
सुदूरपश्चिम विश्वविद्यालय कृषि संकाय अन्र्तगतको टीकापुरस्थित स्कुल अफ एग्रिकल्चरका विद्यार्थीहरुले सयपत्री फूलको खेती गरेका छन । सातौं सेमिष्टरमा अध्ययनरत ३५ जना विद्यार्थीहरुको समूहले फूल खेती गरेको हो । 

उनीहरुले पाठ्यक्रम अध्ययनकै क्रममा ३ कठ्ठा १० धुरमा फूल खेती गरेको बताए । विद्यार्थी बसन्त बोहराले एक विषय अन्र्तगत फूल खेती गरिएको बताए । ‘हाम्रो समूहले सयपत्री फूलको खेती गरेका छौं । अरुले विभिन्न जातका तरकारी र माछा पालन गरेका छन’ उनले भने–‘यो पढाई अन्र्तगतकै क्रियाकलाप हो ।’

तिहारमा सयपत्री फूलको छुट्टै महत्व हुन्छ । विद्यार्थीले तिहारलाई लक्षित गरेर बिक्रीको तयारी समेत गरेका छन । फूल खेतीमा कलेजले नै लगानी गरेको छ । विद्यार्थी बोहराले फूल बिक्री गरेर कलेजको लगानी फिर्ता गर्ने बताए । उनले कलेजको लगानी फिर्ता गरेर बचेको रकम भने विद्यार्थीले खर्च गर्ने जानकारी दिए ।

‘कलेजको लगानी कलेजलाई फिर्ता दिने हो’ उनले भने–‘त्यसबाट बचेको रकम भने हामीले खर्च गर्छौं ।’

विद्यार्थीले विभिन्न ब्यापारीहरुसँग फूल खरिदका लागि कुरा गरेका छन । उनीहरुले टीकापुर, जोशीपुर, भजनी, लम्की लगायतका ठाउँमा पुगेर ब्यापारीलाई फूल खरिदका लागि आग्रह गरेका छन । स्थानीय स्तरमै विद्यार्थीहरुले फूल खेती गरेको सुनेपछि धेरैजसो ब्यापारीले खरिद गर्ने आश्वासन समेत दिएको बोहराले बताए । 

फूल खेती सम्भाव्यता अध्ययनका लागि समेत रहेको विद्यार्थीले बताए । यो ठाउँमा सयपत्री फूलको खेती गर्न सकिन्छ कि सकिदैन भनेर अध्ययन गर्न पनि यस्तो गरेको बोहराले बताए । उनले फूल खेती राम्रो भयो भने स्थानीयलाई यसतर्फ आकर्षित गर्न उत्प्रेरित गर्ने जानकारी दिए । 

‘हामीले उत्पादन र बजारको समेत सम्भाव्यता अध्ययन गरेर कृषकलाई अभिप्रेरित गर्छौ’ बोहराले भने–‘यो केवल हाम्रा लागि मात्रै लाभदायक छैन ।’

उनले फूल खेती गरेर केही व्यक्तिले राम्रो आम्दानी गर्न सक्ने बताए । उनका अनुसार टीकापुरमा सयपत्री फूलको खेतीको राम्रो सभावना छ । 

विद्यार्थीले गतवर्ष समेत थोरै ठाउँमा सयपत्री फूलको खेती गरेका थिए । फूल राम्रोसँग फूलेपछि विद्यार्थीले यसवर्ष व्यवशायिक रुपमै खेती गरेका हुन । उनीहरुले धेरैजसो फूल तिहारमा बिक्री गर्ने योजना बनाएका छन । त्यसका लागि विद्यार्थीले आफै माला उनेर स्टल राख्ने बताए । 

टीकापुर नगरपालिका र जोशीपुर गाउँपालिकाले प्लाष्टिकको माला बिक्रीमा प्रतिबन्ध लगाएका छन । पालिकाहरुले यस्तो निर्णय गरेपछि विद्यार्थीहरु झन उत्साहित भएका छन ।