घोडाघोडी, असोज २८
सुदूरपश्चिम प्रदेशका मुख्यमन्त्री कमलबहादुर शाहले सरकारको लगानीमा बनेका सार्वजनिक भौतिक संरचना  सञ्चालनमा समस्या देखिएको बताएका छन् । 

कैलालीको पर्यटकीय क्षेत्र घोडाघोडीमा बन्दै गरेको धर्मशालाको निरीक्षणका क्रममा मुख्यमन्त्री शाहले सो कुरा बताएका हुन् । धार्मिक तथा पर्यटकीय क्षेत्रले महत्वपूणर् विश्व सिमसार क्षेत्र घोडाघोडीमा ठुलो लगानीमा धर्मशाला निर्माणाधीन अवस्थामा छ ।

राधाकृष्ण मन्दिर भागवत धर्मसेवा समितिको अगुवाइमा निर्माण भइरहेको उक्त धर्मशाला संघ, प्रदेश र स्थानीय सरकारको सहयोग रहेको छ ।मुख्यमन्त्री शाहले घोडाघोडी ताल क्षेत्रको विकास जति हुनपर्ने हो त्यति हुन नसकेको बताए ।

प्रदेश सरकारले २०७८ सालमा चरा अभय आरण्य क्षेत्र घोषणा गरेर यहाँको सिमसार संरक्षणसँगै पर्यटकीय विकास गर्ने लक्ष्य लिएको मुख्यमन्त्री शाहले बताउँदै शाहले भने ‘सरकारले निर्माण गरेका धेरै भौतिक संरचना सञ्चालनमा समस्या देखिएको छ । शीतभण्डार, हाटबजार, सहकारी लगायतका संरचना निर्माणमा सरकारको सहयोग छ । तर सञ्चालनका लागि आवश्यक कर्मचारीलगायत जनशक्ति परिचालन नहुँदा समस्या देखिएको छ ।’

सरकारले निर्माणमा सहयोग गरे पनि कर्मचारी व्यवस्थापनमा सहयोग नगर्ने भएकाले त्यसको व्यवस्थापन सञ्चालक स्वयमले गर्नुपर्ने मुख्यमन्त्री शाहको भनाइ छ । घोडाघोडी घुम्न र दर्शन गर्न आउनेहरुलाई सर्वसुलभ रुपमा बास बस्नका लागि दुई बर्ष अगाडि स्थानीयको पहलमा धर्मशाला निर्माण शुरु गरिएको समितिका सचिव लक्ष्मीप्रसाद भट्टराईले जानकारी दिए । 

धर्मशाला निरिक्षण कार्यक्रममा घोडाघोडी नगरपालिकाका नगरप्रमुख खडकबहादुर रावत, वडाअध्यक्षहरु, घनश्याम ओझा, लोकबहादुर चन्द, भरतबहादुर शाही, कृष्ण कँडेललगायतको उपस्थिति रहेको थियो ।