टीकापुर, भदौ ६
कैलालीको पूर्वी क्षेत्रका विभिन्न स्थानमा पछिल्लो तीन घण्टामा भारी वर्षा भएको छ । लम्कीचुहा नगरपालिकाको वडा नं. ८ बचैलामा विहान ६ः१५ बजे गरिएको मापनमा पछिल्लो एक घन्टामा ४३.२ मिलिमिटर वर्षा भएको छ । 

त्यस्तै लम्कीचुहाकै वडा नं. ४ बलियामा ३६.४ मिलिमिटर पानी परेको छ भने बर्दियाको दौलतपुरमा २६.४ मिलिमिटर पानी परेको जल तथा मौसम विज्ञान विभागले जनाएको छ ।

जल तथा मौसम विज्ञान विभाग, बाढी पूर्वानुमान केन्द्रले कैलालीका विभिन्न स्थान भएर बग्ने पथरिया, कुलरिया, जमरा लगायत साना, ठूला खोलामा बाढीको जोखिम रहेको उल्लेख गर्दैै सतर्कता अपनाउन स्थानीयलाई आग्रह गरेको छ । 

लगातारको पानीका कारण कैलालीको दक्षिणी क्षेत्रमा डुबान हुनसक्ने भन्दै सचेत रहन जिल्ला प्रशासन कार्यालय कैलालीले आग्रह गरेको छ ।