टीकापुर, साउन २८
संघीय सरकारमा सत्तासमीकरण फेरिएसँगै दोश्रो कार्यकालका लागि मुख्यमन्त्री बनेका सुदूरपश्चिम प्रदेशका मुख्यमन्त्री कमलबहादुर शाहले साउन ३० गते विश्वासको मत लिने भएका छन् । 
साउन ३० गते बिहान ११ बजे बस्ने प्रदेशसभा बैठकमा विश्वासको मत लिने कार्यक्रम तय भएको मुख्यमन्त्रीका स्वकीय सचिव रामबहादुर विष्टले जानकारी दिए ।
नेपाली काँग्रेसका शाह, नेकपा (एमाले) र नागरिक उन्मुक्ति पार्टीको सहयोगमा साउन २० गते दोस्रो पटक सुदूरपश्चिमको मुख्यमन्त्रीमा नियुक्त भएका थिए । 

संविधानको धारा १६८ को उपधारा (२) बमोजिम नियुक्त भएका मुख्यमन्त्रीले एक महिना भित्र सदनबाट विश्वासको मत लिने प्रावधान रहेको छ । ५३ सदस्यी सुदूरपश्चिम प्रदेश सभामा बहुमत प्राप्त गर्न २७ जना प्रदेश सभा सदस्यको समर्थन आवश्यक पर्छ । 

सत्तारुढ दल काँग्रेसका १८, एमालेका ११ र नागरिक उन्मुक्ति पार्टीका सात जना प्रदेश सभा सदस्य रहेकाले मुख्यमन्त्री शाहले विश्वासको मत प्राप्त गर्ने निश्चित छ ।