टीकापुर, साउन २५
जंगली जनावर चितुवाले एक साता यता घरपालुवा जनावर बाख्रा, कुखुरा मार्न थालेपछि कैलालीको टीकापुरमा त्रास बढेको छ । गत सातादेखि चितुवाले टीकापुरका विभिन्न स्थानमा दैनिक बाख्रा, कुखुरा र कुकुरमा मार्न थालेपछि स्थानीयमा त्रास बढेको हो ।
गए राति समेत चितुवाले स्थानीयका बाख्रा र कुखुरा मारेको टीकापुर नगरपालिका वडा नं. १ का वडाध्यक्ष मोहनसिंह लुहार (वि.क.)ले जानकारी दिए । चितुवाले टीकापुर नगरपालिकाको वडा नं १ ब्लक बी, सी, १७ र १८ मा गरी एकै सातामा स्थानीयका २२ बाख्रा मारेको छ भने केही बाख्राहरु घाइते भएका छन् । त्यत्तिकै संख्यामा कुखुरा र कुकुर समेत मारेको स्थानीयहरु बताउँछन् ।
चितुवाले गए राति ब्लक नं. १७ मा रहेको मिनबहादुर नेपालीको खोरबाट २६ वटा कुखुरा मारेको छ । चितुवाले कुखुराकै खोरमा आक्रमण गरेपछि स्थानीय होहल्ला गर्दा दुई बच्चासहितको चितुवा भागेको स्थानीय रमेश खड्काले बताए ।
गए राति नै ब्लक नं. १८ मा समेत चितुवाको आक्रमणबाट एक बाख्रा घाइते भएको थियो । स्थानीय नर परियारले बुधवार राति ११ बजे बाख्रा कराएपछि आफूले होहल्ला गर्दा छिमेकीको बाख्रा घाइते अवस्थामै छोडेर चितुवा भागेको बताए ।
‘एक हप्ता भयो, ब्लक नं. १७÷१८ तिरै बाख्रा, कुखुरा मारिरहेको छ’ परिवारले भने ‘गएराति समेत एक छिमेकीको घरबाट बाख्रा लिँदै गरेको थाह पाएपछि दुई बच्चा सहितको चितुवा भागेछ, यो घटनाले निकै त्रास फैलिएको छ ।’
चितुवाले दैनिक जसो घरमै पसेर बाख्रा मारेपछि स्थानीयहरुमा त्रास फैलिएको छ । दैनिक बाख्रा मार्न थालेपछि टीकापुर नगरपालिकाको अनुरोधमा बर्दिया राष्ट्रिय निकुञ्ज र राष्ट्रिय प्रकृति संरक्षण कोषको संयुक्त टोली दुई दिनदेखि टीकापुरमा परिचालित छ ।
बर्दिया राष्ट्रिय निकुञ्जका वन्यजन्तु प्राविधिक जगनारायण चौधरी, राष्ट्रिय प्रकृति संरक्षण कोषका वन्यजन्तु प्राविधिक फिरुलाल थारू, करारु चौधरी, इलाका प्रहरी कार्यालय टीकापुर र नगर प्रहरीलगायत टोलीले चितुवा नियन्त्रणको प्रयास गरिरहेको छ । चितुवा खोज्न विभिन्न स्थानमा टोली समेत परिचालन गरिएको इलाका प्रहरी कार्यालय टीकापुरका प्रमुख डिएसपी विश्वराज अधिकारीले जानकारी दिए ।
राष्ट्रिय प्रकृति संरक्षण कोषका वन्यजन्तु प्राविधिक फिरुलाल थारूले चितुवा नियन्त्रणमा लिन पासो थापिएको जानकारी दिए । ढिलोचाँडो चितुवा नियन्त्रणमा आउने उल्लेख गर्दै उनले स्थानीयलाई नआत्तिन र सचेत रहन आग्रह गरे । ‘स्थानीयले तीन चितुवा देखेको बताएका छन्, हामी चितुवा नियन्त्रणको प्रयासमा दुई दिनदेखि लागिरहेका छौं’ प्राविधिक थारुले भने ।
शहरमै चितुवा देखिन थालेपछि कतिपय किसानले बाख्रा घरभित्र बाँध्न थालेका छन् । चितुवाले दैनिक जनावर मार्न थालेपछि साँझ बिहान हिँडडुल गर्नेहरू त्रासमा छन् । यस्तै नियमित योगाभ्यास गर्नेहरू पनि घरबाट निस्कन डराउने गरेका नेकपा एमालेका नगर अध्यक्ष लक्ष्मण थापाले बताए ।
चितुवाले दैनिक आतंक मच्चाउन थालेपछि इलाका प्रशासन कार्यालय, नगरपालिका, इलाका प्रहरी र राजनीतिक दलको उपस्थितिमा निकुञ्ज र कोषको टोलीले थप पासोहरु राख्ने निर्णय गरेको छ ।
‘दिनमा ड्रोन क्यामेराको सहायतले चितुवाको खोजी गर्ने निर्णय भएको छ’ इलाका प्रहरी कार्यालय टीकापुरका प्रमुख डिएसपी अधिकारीले भने ‘हिजो स्थानीय वीरेन्द्र विद्यामन्दिर माध्यमिक विद्यालयको जग्गामा रहेको उखुबारी र केराबारी नजिक पासो थापिएको थियो, आज थप दुई वटा पासो थप्ने निर्णय भएको छ ।’
उनले स्थानीइ नागरिकलाई सचेत गराउने सूचना प्रवाह गर्ने, नगरपालिकाको ड्रोन क्यामेराबाट खोजी गर्ने र सुरक्षा टोली समेत परिचालन गर्ने निर्णय भएको बताए । बर्दिया राष्ट्रिय निकुञ्जबाट कर्णाली नदी तरेर बच्चा सहितको चितुवा वडा नं. २ मा रहेका सामुदायिक वन हुँदै बजार क्षेत्रमा पसेको आशङ्का गरिएको छ ।
बजार क्षेत्रमा मात्र नभएर चितुवाले टीकापुरको वडा नं. ७ र ८ मा समेत आतङ्क मच्चाएको छ । त्यहाँ पनि चितुवाले दैनिक बाख्रा, घरपालुवा कुकुर र भैँसी मार्न थालेको वडा नं. ८ का वडाध्यक्ष दीर्घबहादुर ठकुल्लाले बताए ।
‘दुई साता अघि मात्रै घरमा रहेको खोरमा पसेर चितुवाले बाख्रा र कुकुर मारेका हो’ अध्यक्ष ठकुल्लाले भने ‘घरमै पसेर आतंक मच्चाउन थालेपछि मान्छेलाई नै आक्रमण गर्ने हो कि भन्ने त्रास स्थानीयमा छ, हामी यसको नियन्त्रणका लागि पहल गरिरहेका छौं ।’
