धनगढी, साउन १८
संसदमा सम्बोधनका क्रममा मार्ग प्रशस्त गर्ने भनेका सुदूरपश्चिम प्रदेशका मुख्यमन्त्री दीर्घ सोडारीले प्रदेश प्रमुख नजिर मियाँलाई राजीनामा बुझाएका छन ।
प्रदेश सभामा अल्पमतमा परेका सोडारीले शुक्रबार विश्वासको मत लिने घोषणा गरेका थिए । तर, उनले विश्वासको मत नलिई राजीनामाको घोषणा गरेका थिए ।
नेपाली कांग्रेससँग सहमतिपश्चात असार २० गते नेकपा एमालेले सोडारी सरकारलाई दिएको विश्वासको मत फिर्ता लिएको थियो । त्यसपछि संविधानअनुसार पाउने ३० दिनको सुबिधा उपभोग गरेर सोडारीले शुक्रबार राजीनामा गरेका हुन ।
योसँगै प्रदेशमा नयाँ सरकार निर्माणका लागि नेपाली कांग्रेस र नेकपा एमालेलाई बाटो खुलेको छ । यहाँ कांग्रेसको नेतृत्वमा सरकार बनाउने कांग्रेस–एमालेको सहमति छ ।
५३ सदस्यीय प्रदेश सभामा कांग्रेसका १८, एमालेका ११, नेकपा माओवादी केन्द्रका सभामुखसहित ११, नागरिक उन्मुक्तिका ७, नेकपा एकीकृत समाजवादीका ४, राप्रपा र स्वतन्त्र १/१ सांसद छन ।
कांग्रेस–एमालेलाई सरकार बनाउन पर्याप्त बहुमत छ । यस्तोमा नागरिक उन्मुक्तिको पनि समर्थन हुने तय छ ।
कांग्रेसबाट नयाँ सरकारको नेतृत्वका लागि भने रस्साकस्सी चलिरहेको छ । मुख्यमन्त्रीमा पूर्वमुख्यमन्त्री एवं संसदीय दलका नेता कमलबहादुर शाह, पूर्व भौतिक पूर्वाधारमन्त्री प्रकाश देउवा, कांग्रेसका पुराना नेता बहादुरसिंह थापाबीच हानथाप छ । उनीहरूसँगै दिवानसिँह विष्ट पनि मुख्यमन्त्रीको दौडमा छन ।
