गोदावरी, साउन ७
कैलाली जिल्लामा सञ्चालित २ शय ८९  घरेलु तथा साना उद्योग बन्द भएका छन् । कच्चापदार्थ अभाव, उत्पादित सामग्रीले बजार मूल्यसँग प्रतिस्पर्धा गर्न नसक्नुलगायतका कारण ती उद्योग बन्द भएको घरेलु तथा साना उद्योग कार्यालयले जनाएको छ । 

कतिपय उद्योग सञ्चालक रोजगारीका लागि वैदेशिक रोजगारीमा गएको देखिएको छ । कार्यालयका लेखा अधिकृत टिकेन्द्रप्रसाद जोशीले खाने तेल, सिमेन्ट ब्लक, पोल्ट्रीफार्म, ब्युटीपार्लर जस्ता घरेलु उद्योग बन्द भई खारेजीमा परेको जानकारी दिए । 

पछिल्लो समय उद्योग दर्तामा महिलाको स्वामित्व उल्लेख्य रुपमा बढ्दै गएको छ । महिलाका नाममा प्राइभेट फार्म दर्तामा छूटको व्यवस्था गरिएसँगै उद्योग दर्तामा महिलाको स्वामित्व बढेको हो ।

एक करोड सम्मको कुल पूँजी भएका निजी फार्म महिलाका नाममा दर्ता गर्दा शुल्कमा छुटको कानुनी व्यवस्था गरिँदा उद्योगमा महिलाको स्वामित्व उल्लेख्य रुपमा बढेको जोशीले बताए । कैलालीमा हालसम्म १५ हजार ४ शय ८६ उद्योग दर्ता छन् । 

उद्योग कार्यालयमा अहिलेसम्म उत्पादनमूलक ३ हजार २ शय आठ, कृषि सम्बन्धी ६ हजार ५ शय १४, निर्माण सम्बन्धी दुई, पर्यटनमूलक ६५, सूचना प्रविधिमूलक १२, सेवामूलक ५ हजार ६ शय ८५ गरी १५ हजार ४ शय ८३ उद्योग दर्ता भएका छन् । अहिलेसम्म दर्ता भएका उद्योगमा २५ अर्ब ७० करोड ३७ लाख लगानी प्रस्ताव गरिएको छ । ती उद्योगमा ९ हजार २ शय ११ महिला र ६९ हजार ६ शय ५७ पुरुषलाई रोजगारी प्रस्ताव गरिएको जनाइएको छ । 

गत आव २०८०र८१ मा उत्पादनमूलक १ शय ३५, कृषिमूलक तीन शय २३, सेवामूलक २ शय ५६ गरी जम्मा ७ शय १४ उद्योग दर्ता भएको लेखा अधिकृत जोशीले बताए । गत आवमा  एक करोड ७७ लाख ४४ हजार ७ शय ७७ राजस्व सङ्कलन भएको छ । अघिल्लो आव २०७९र०८० मा १ हजार १ शय ९७ उद्योग दर्ता भएकामा कार्यालयले ५२ लाख १६ हजार राजस्व सङ्कलन गरेको थियो । 

अघिल्ला आवभन्दा गत आव २०८०र८१ मा उद्योग दर्तामा कमी आएको छ । लेखा अधिकृत जोशीले अघिल्लो आवको तुलनामा गत आव २०८०र८१ मा करको दर बढेसँगै वाणिज्य कार्यालयले दर्ता गर्ने पसललगायतका काम गत आवदेखि घरेलु तथा साना उद्योग कार्यालयले गर्दा राजस्व सङ्कलनमा वृद्धि भएको बताए ।
रासस