टीकापुर, साउन २
टीकापुर जेसिजको सप्ताहव्यापी कार्यक्रमको चौथो दिन ट्राफिक सचेतनाका लागि सुस्त गति मोटरसाइकल दौड प्रतियोगिता सम्पन्न भएको छ । २० जना सहभागी रहेको सुस्त गति प्रतियोगितामा प्रविन चौधरी प्रथम भएका छन् । चौधरीले निर्धारित दुरी २ मिनेट ५ सेकेण्डमा पूरा गरेका थिए ।
त्यस्तै अमृत चौधरीले १ मिनेट ३९ सेकेण्डमा दूरी पार गर्दै द्वितीय भएका छन् भने १ मिनेट ३७ सेकेण्डमा दूरी पार गर्दै पूणर्बहादुर रावल तृतीय भएका छन् । बिजेतालाई हेल्मेट तथा ईसेवाको तर्फबाट टिसर्ट र कप पुरस्कार प्रदान गरिएको थियो ।
प्रतियोगिताका संयोजक सुनिल चौधरीको अध्यक्षतामा भएको कार्यक्रमका प्रमुख अतिथि टीकापुर जेसिजका पूर्व अध्यक्ष प्रकाश शाह रहेका थिए । कार्यक्रममा पूर्व अध्यक्ष टोपप्रकाश वि.क., अस्थायी ट्राफिक प्रहरी कार्यालय टीकापुरका इञ्चार्ज टेकबहादुर चन्द लगायतले बोलेका थिए ।
कार्यक्रमको सञ्चालन महासचिव भरत भण्डारीले गरेका हुन् । सप्ताहको पाँचौ दिन भोलि लागुऔषध दुव्यर्सनी सम्बन्धी सचेतनामूलक कार्यक्रम टीकापुर नगरपालिका वडा नं. २ स्थित कालिका आधारभूत विद्यालयमा हुने महासचिव भण्डारीले जानकारी दिएका छन् ।
