टीकापुर, असार १५

आज असार १५, धान दिवस । ‘जलवायु मैत्री कृषि, धान उत्पादनमा वृद्धि’ भन्ने नाराका साथ २१ औँ राष्ट्रिय धान दिवस विभिन्न कार्यक्रमको आयोजना गरी मुलुकभर मनाइँदै छ । कैलालीका विभिन्न स्थानहरुमा विभिन्न संघसंस्था, संगठनहरुले रोपाई गरेर धान दिवस मनाएका छन् ।

नेपाली काँग्रेस टीकापुर नगर कार्यसमितिले टीकापुर नगरपालिका वडा नं. ३ रामपुरस्थित जग्गुप्रसाद चौधरीको खेतमा रोपाई गरेर धान दिवस मनाएको छ ।

पार्टीका नेता, कार्यकर्ता, भातृ संस्थाका प्रतिनिधिहरुको उपस्थितिमा चौधरीको खेतमा धान रोपेर दिवस मनाइएको नगर सभापति नरेशकुमार खत्रीले जानकारी दिए । हरेक वर्ष असार १५ गतेका दिन पार्टीले धान दिवस मनाउँदै आएको खत्रीले बताए ।

त्यस्तै नेकपा एमाले टीकापुर नगर कमिटीले समेत वडा नं. ४ स्थित ठाकुरराम डगौरा चौधरीको खेतमा रोपाई गरेर राष्टिय धान दिवस मनाएको छ ।

पार्टीका नेता कार्यकर्ता, विद्यार्थी संगठनका प्रतिनिधिहरुको उपस्थितिमा धान दिवस मनाइएको नगर अध्यक्ष लक्ष्मण बहादुर थापाले जानकारी दिए ।

किसानलाई सहयोग गर्दै धान उत्पादनमा जोड दिनका लागि पार्टीले किसानको खेतमै पुगेर धान दिवस मनाइएको थापाले बताए ।