टीकापुर जेसीजले गर्यो रक्तदान कार्यक्रम
टीकापुर, जेठ ३२
विश्व रक्तदाता दिवसको अवसरमा टीकापुर जेसीजले आज रक्तदान कार्यक्रमको आयोजना गरेको छ । टीकापुरस्थित सिद्धार्थ होटलमा आयोजना गरिएको कार्यक्रममा १४ जनाले रगत दान गरेका छन ।
नेपाल रेडक्रस सोसाइटी टीकापुरसँगको सहकार्यमा रक्तदान कार्यक्रम आयोजना गरिएको हो । टीकापुर जेसीजका अध्यक्ष रुपकबहादुर बिष्टको अध्यक्षतामा भएको रक्तदान कार्यक्रमको प्रमुख अतिथि नेपाल पत्रकार महासंघ सुदूरपश्चिम प्रदेश समितिका अध्यक्ष योगेश रावल रहेका थिए ।
सो अवसरमा बोल्दै प्रमुख अतिथि रावलले रगत दान पुण्यको काम भएको बताए । उनले हरेक ९० दिनमा शरीर भित्रै खेर जाने रगतले रगत दान गर्दा अरु कसैको ज्यान जोगिने बताए ।
रावल स्वयम्ले समेत रगत दान गरेका छन । उनी नियमित रक्तदाता हुन । उनले ५१ औं पटक रगत दान गरेका हुन ।
कार्यक्रममा विशिष्ट अतिथि टीकापुर जेसीजका मानार्थ सदस्य पृथ्वीराज ढुंगाना र नेपाल पत्रकार महासंघ अछामका पूर्वअध्यक्ष बेदप्रकाश तिमिल्सैनाले रक्तदान कार्यक्रम आयोजना गरेकोमा धन्यवाद व्यक्त गरेका थिए ।
कार्यक्रम महासचिव भरत भण्डारीले सञ्चालन गरेका थिए भने स्वागत मन्तव्य जनसम्पर्क अधिकारी लिखराम चौधरीले र जेसीज आस्था पाठ पदम शाहीले गरेका थिए ।
प्रकाशित मिति: शुक्रबार, जेठ ३२, २०८१ १५:०६
प्रतिक्रिया दिनुहोस्
थप समाचार
साताको लोकप्रीय
