टीकापुर, जेठ २३
कैलालीमा ट्याक्टर दुर्घटनामा एक जनाको ज्यान गएको छ । कैलालीको चुरे गाउँपालिका वडा नं. ३ भक्तपुर स्थित बिपिनगर सडकखण्डमा सहजपुरबाट बिपिनगरतर्फ जादै गरेको सुदूरपश्चिम प्रदेश ०१००२ त ५२७८ नम्बरको ट्याक्टरले ओभर टेक गर्ने क्रममा भे २ त १५१६ नम्बरको ट्याक्टरलाई ठक्कर दिँदा २० वर्षीय हेमन्त रावलको ज्यान गएको हो ।
ओभर टेक गर्दा दुर्घटना भएर भे २ त १५१६ नम्बरको ट्याक्टर सडकमा पल्टिदा सोही ट्याक्टरको चालक डोटीको जोरायल गाउँपालिका वडा नं. ४ का रावलको घटनास्थलमै ज्यान गएको जिल्ला प्रहरी कार्यालय कैलालीले जनाएको छ ।
ट्याक्टरमा सवार जोरायलकै २२ वर्षीय लक्की बादी र कञ्चनपुरको भीमदत्त नगरपालिका वडा नं. १५ का १७ वर्षीय गजेन्द्र दमाई घाइते भएका छन् ।
घाइते दुबै जनाको माया मेट्रो अस्पताल धनगढीमा उपचार भइरहेको प्रहरीले जानकारी दिएको छ ।
जिल्ला प्रहरी कार्यालय कैलालीका अनुसार सुदूरपश्चिम प्रदेश ०१००२ त ५२७८ नम्बरको ट्याक्टर र ट्याक्टर चालकलाई नियन्त्रणमा लिई आवश्यक अनुसन्धान भइरहेको छ ।
