टीकापुर, जेठ ३

कैलालीको जानकी गाउँपालिका वडा नं. १ दुर्गौलीमा आजदेखि कृषि मेला हुने भएको छ ।

किसानका उत्पादनको बजारीकरण गर्न, बिउविजन तथा कृषि प्रविधिको जानकारी दिन तथा कृषि विज्ञसँग छलफल तथा अन्तरक्रिया गर्न मेला आयोजना गरिएको हो ।

गाउँपालिकाका अध्यक्ष गणेश चौधरीले मेलामा ५० स्टल रहने जानकारी दिए । मेलामा कृषकका उत्पादन, बिउबिजन कम्पनीका प्रतिनिधि, कृषि औजारको प्रदर्शनी तथा स्कुल अफ एग्रिकल्चर टीकापुरका प्राविधिक सम्मेलित स्टलहरु रहने छन् ।

अध्यक्ष चौधरीका अनुसार तीन दिनसम्म आयोजना हुने मेलामा १० हजार किसानको सहभागिता हुनेछ भने ५० लाख बढीको कारोवार हुने अनुमान गरिएको छ ।

मेला गाउँपालिका, कृषि व्यापार तथा प्रबद्र्धन केन्द्र, सिमेट लगायत संघसंस्थाको सहकार्यमा आयोजना गरिएको हो ।