टीकापुर, चैत २८
नयाँ वर्षको आगमनसँगै राष्ट्रिय युवा संघ टीकापुर नगर कमिटीले टीकापुर पार्कमा आज सरसफाई गरेको छ । पार्कमा नयाँ वर्षको अवसरमा देशका विभिन्न जिल्लाबाट आन्तरिक पर्यटक आउने गरेका छन ।
विगत केही दिनदेखी नै आन्तरिक पर्यटक घुम्न आउने क्रम सुरु भैसकेको छ । आन्तरिक पर्यटक आउन थालेपछि पार्क क्षेत्रमा फोहोर भैरहेको छ ।
आन्तरिक पर्यटकले भरिने टीकापुर पार्क सफा सुन्दर देखियोस् भन्ने उद्देश्यले सरसफाई कार्यक्रमको आयोजना गरिएको राष्ट्रिय युवा संघ टीकापुर नगर कमिटीका अध्यक्ष नवराज ठकुल्लाले जानकारी दिए ।
उनले सरसफाई कार्यक्रमलाई कुनै औपचारिकता नदिईएको बताए । सरसफाई कार्यक्रममा टीकापुर नगरपालिकाका पूर्वमेयर तपेन्द्र रावल, वडा नम्बर १ का वडाध्यक्ष मोहन विक, पार्टीका प्रदेश सदस्य मातृका तिमिल्सेना, नेकपा एमाले नगर कमिटी अध्यक्ष ध्रुव खत्री, युवा संघका केन्द्रिय सदस्य तथा कैलाली जिल्ला इञ्चार्ज उमेश तुलाचन, जिल्ला अध्यक्ष लक्ष्मण थापा लगायतको उपस्थिति रहेको थियो ।
