प्रदेश सभाको बैठक स्थगित
धनगढी, माघ २३
हिउँदे अधिवेशन शुरु भएको केही दिनमै सुदूरपश्चिम प्रदेश सभाको बैठक अर्को सूचना जारी नहुँदासम्मको लागि स्थगित गरिएको छ । तेस्रो अधिवेशनको सातौँ बैठकमा मंगलवार सभामुख भीम भण्डारीले अनिश्चितकाल सम्मको लागि स्थगित भएको जानकारी दिएका हुन् ।
बैठक स्थगित हुनु अघि सुदूरपश्चिम प्रज्ञा प्रतिष्ठान ऐन २०७६ लाई संशोधन गर्न बनेको विधेयकमाथि सामान्य छलफल भएको थियो ।
कांग्रेस सांसद मानबहादुर रावलले प्रज्ञा प्रतिष्ठानको काम कारबाही बारे आफूहरू बेखवर रहेको र १० जना सदस्यहरू बाट १८ जना सदस्य बनाउने कुरा उचित नभएको बताएका थिए ।
माओवादी सांसद शिवसिंह ओलीले सुदूरपश्चिम प्रदेशको पहिचान र संस्कृति भाषा साहित्यको लागि प्रज्ञा प्रतिष्ठान आवश्यक रहेको बताए । राजनैतिक हस्तक्षेप नगर्ने गरी प्रज्ञा प्रतिष्ठान बनाउनु पर्नेमा जोड दिए । ‘यसमा सरकारको मुख्यमन्त्री कुलपति मन्त्री सहकुलपति बन्नु पर्ने केही कारण छैन’ उनले भने ‘कुलपति र उपकुलपति पनि प्राज्ञिक व्यक्तिलाई दिनुपर्छ ।’
एमाले संसदीय दलका नेता राजेन्द्रसिंह रावलले प्रज्ञाको क्षेत्रमा पनि राजनैतिक हस्तक्षेप गर्न नहुने बताएका थिए । प्रदेशलाई आर्थिक भार बढाउने गरी सङ्ख्या बढाउन थालेको भन्दै ९ जिल्लाका ९ प्रतिनिधिको रूपमा ल्याउनु पर्नेमा उनले जोड दिए ।
नागरिक उन्मुक्ति पार्टीकी इन्दिरा जोशीले प्रदेशको कला संस्कृति र भाषा संरक्षणमा प्रतिष्ठानले महत्त्वपूणर् भूमिका खेल्नेमा विश्वास व्यक्त गरिन् ।
नेकपा एकीकृत समाजवादीका प्रकाश रावलले सुदूरपश्चिमको संस्कृति व्यवस्थित गर्न विधेयक आएको बताए । ओझेलमा परेको भाषा र संस्कृति संरक्षणमा टेवा पुग्ने उनको भनाइ थियो । काङ्ग्रेसकी सांसद तुलसि देवकोटाले समय सापेक्ष अनुसार परिवर्तन गर्नु पर्ने बताइन् ।
सामान्य छलफलमा उठेका प्रश्नबारे आन्तरिक मामिला तथा कानुन मन्त्री शिवराज भट्टले जवाफ दिएका थिए ।ठुलो क्षेत्र भएको हुँदा १८ जना सदस्य आवश्यक पर्ने उनले बताए ।
प्रकाशित मिति: मंगलबार, माघ २३, २०८० २०:०२
प्रतिक्रिया दिनुहोस्
थप समाचार
साताको लोकप्रीय
