टीकापुर, पौष २६
टीकापुर उद्योग वाणिज्य संघले आयोजना गर्ने सुदूरपश्चिम औद्योगिक ब्यापार मेला तथा टीकापुर महोत्सव २०८० को सम्पूर्ण तयारी पूरा भएको छ । मञ्च सजावट बाहेकका सम्पूर्ण तयारीका कामहरु पूरा भएको आयोजक टीकापुर उद्योग वाणिज्य संघले जनाएको छ ।
महोत्सव तयारी तथा व्यवस्थापन समितिका संयोजक एवं संघका वरिष्ठ उपाध्यक्ष सन्तोष खड्काले महोत्सवको सम्पूर्ण तयारी पूरा भएको बताए । ‘मञ्चको सजावटबाहेकको सम्पूर्ण तयारी पूरा भइसकेको छ’ संयोजक खड्काले भने ‘यस पटकको महोत्सवमा २ शय बढी स्टलहरु रहेका छन् ।’
हरेक वर्षजसो महोत्सवभित्र थारु समुदायका परिकार, पहिरन र पहिचान झल्काउने स्टलहरु समेत राखिएको संयोजक खड्काले बताए । महोत्सवको उद्घाटन सरकारका उपप्रधान तथा रक्षामन्त्री पूर्णबहादुर खड्काले गर्ने भएका छन ।
भोलिदेखि माघ ८ गतेसम्म सञ्चालन हुने महोत्सवलाई टीकापुर ट्युसन सेन्टर (टिसिसी) ले टाइटल प्रायोजन गरेको छ ।
महोत्सवका उद्घाटन कार्यक्रमका प्रमुख अतिथिलाई संघले टीकापुरबासीका तर्फबाट यस क्षेत्रका विभिन्न मागहरु समेत राख्ने गरेको छ । २०६५ सालमा लम्की–टीकापुर–खक्रौला सडक कालोपत्रेको एकल सुत्रीय माग राखेको महोत्सवले त्यसयता आयोजना भएका महोत्सवमा आउने अतिथिहरुलाई यसैगरी माग राख्दै आएको छ ।
संघले विगतदेखि उठाउँदै आएका मागहरु सम्बोधनका लागि राज्यको ध्यानाकर्षण गराउन महोत्सवले महत्वपूर्ण भूमिका खलिरहेको बताउँदै संघका अध्यक्ष चक्रपाणी सापकोटाले महोत्सव राज्यविरुद्धका सालिन आन्दोलन समेत भएको बताए ।
‘राज्यबाट पछाडि परेको टीकापुर क्षेत्रमा राज्यको ध्यानाकर्षण गर्न हामीले महोत्सव आयोजना गर्दै आएका छौं’ सापकोटाले भने ‘हामी सबैले यसलाई अन्य रमाइलो मेला जस्तो नसोचेर राज्यविरुद्धको सालिन आन्दोलनका रुपमा लिन जरुरी छ ।’
महोत्सवमा यसवर्ष समेत थारु गाउँसहित कृषि प्रर्दशनी, विज्ञान प्रदशर्नी, अटोमोवाइल्स, रमाइलो मेलाका साथै व्यापारिक स्टलहरु रहेका छन् भने महोत्सवका पाहुनाहरुलाई सत्तीमा निर्मित बेतबाँसका सामाग्रीबाट बनेको मायाको चिनो वितरण गरिनेछ ।
