टीकापुर, पौष १८

कैलालीको लम्कीचुहा नगरपालिका वडा नं. ३ गोरांगेमा ट्याक्टरबाट खसेर एक जनाको ज्यान गएको छ ।

ढुंगा लोड गरेर फर्किरहेको से १ त २३२७ नम्बरको ट्याक्टरबाट खसेर जानकी गाउँपालिका वडा नं. ६ जगतपुरका ६० वर्षीय देवबहादुर शाहको मंगलवार साँझ ज्यान भएको हो ।

ढुङ्गा लोड गरिएको ट्याक्टर जगतपुर जाने क्रममा ट्याक्टरबाट खसेर शाह गम्भीर घाइते भएका थिए ।

घाइते भएका शाहलाई उपचारको लागि लालरत्न अस्पताल लम्की हुँदै थप उपचारको लागि टीकापुर अस्पताल लैजाने क्रममा बाटोमा मृत्यु भएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक कुलदीप चन्दले जानकारी दिए ।

ट्याक्टर चालक जानकी गाउँपालिका वडा नं. ६ जगतपुरका ३६ वर्षीय दयाशंकर चौधरीलाई प्रहरीले नियन्त्रणमा लिएर अनुसन्धान गरिरहेको छ ।