टीकापुर, पुष १०
लगातार दुई महिना लक्ष्य भेटाउन नसकेको कैलालीको सत्ती भन्सार कार्यालयले मंसिर महिनामा भने लक्ष्य भन्दा बढी राजश्व संकलन गरेको छ । भन्सार विभागबाट एक करोड ३ लाख २७ हजार रुपैयाँ लक्ष्य पाएको कार्यालयले २१ लाख बढी राजश्व संकलन गरेको छ ।

कार्यालय प्रमुख धनबहादुर शाहीका अनुसार मंसिर महिनामा एक करोड २४ लाख ४ हजार ३८७ रुपैयाँ संकलन भएको छ । अघिल्लो दुई महिना भने कार्यालयले लक्ष्य अनुसारको राजश्व संकलन गर्न सकेको थिएन ।

कात्तिक महिनामा लक्ष्यको नजिक पुगेको कार्यालयले असोज महिनामा भने ५७ दशमलव ५० प्रतिशत राजश्व मात्रै संकलन गरेको थियो । कार्यालयले कात्तिकमा ९८ लाख १२ हजार रुपैयाँ र असोजमा एक करोड ८८ लाख ९ हजार रुपैयाँ लक्ष्य प्राप्त गरेको थियो । कार्यालय प्रमुख शाहीका अनुसार कात्तिकमा ९२ लाख ३५ हजार र असोजमा ६२ लाख ६१ हजार मात्रै राजश्व संकलन भएको थियो ।

कार्यालयले भदौ महिनामा समेत लक्ष्य भन्दा राजश्व संकलन गरेको थियो । ९८ लाख ७८ हजार रुपैयाँ संकलन गर्ने लक्ष्य पाएकोमा कार्यालयले भदौमा एक करोड ११ लाख ८० हजार ९९२ रुपैयाँ संकलन गर्न सफल भएको थियो । त्यस्तै चालु आर्थिक वर्षको पहिलो महिनामा ७८ लाख १० हजार रुपैयाँ संकलन गर्ने लक्ष्य पाएकोमा ७१ लाख ९ हजार ७५२ रुपैयाँ मात्रै संकलन भएको थियो । यो लक्ष्यको ९१ दशमलव ०३ प्रतिशत मात्रै हो ।

चालु आवमा कार्यालयले लक्ष्य अनुसारको राजश्व संकलन गर्ने सम्भावना कम रहेको छ । अघिल्ला पाँच आर्थिक वर्षमा कार्यालयले एकमा मात्रै लक्ष्य भन्दा बढी राजश्व संकलन गर्न सफल भएको देखिन्छ ।

उसले आर्थिक वर्ष २०७७/०७८ मा मात्रै ११ प्रतिशत बढी राजश्व संकलन गरेको छ । सो आर्थिक वर्ष कार्यालयले १४ करोड २३ लाख ४८ हजार रुपैयाँ राजश्व संकलन गर्ने लक्ष्य पाएकोमा १५ करोड ८३ लाख ७ हजार रुपैयाँ संकलन गरेको थियो ।

आर्थिक वर्ष २०७५/०७६ मा लक्ष्य ९ करोड र संकलन ५ करोड ६९ लाख ११ हजार रुपैयाँ, आर्थिक वर्ष २०७६/०७७ मा लक्ष्य ७ करोड २९ लाख ७७ हजार र संकलन ५ करोड ८० लाख ७ हजार रुपैयाँ भएको थियो ।

त्यस्तै आर्थिक वर्ष २०७८/०७९ मा लक्ष्य २० करोड ५८ लाख ६१ हजार र संकलन १० करोड ६९ लाख ९३ हजार र आर्थिक वर्ष २०७९/०८० मा लक्ष्य १६ करोड ९४ लाख ४१ हजार र संकलन ७ करोड ५० लाख ४० हजार रुपैयाँ भएको कार्यालय प्रमुख शाहीले जानकारी दिए ।

उनका अनुसार चोरी तस्करी र क्वारेन्टाईनको अभावमा कार्यालयले लक्ष्य अनुसारको राजश्व संकलन गर्न समस्या भैरहेको छ । उनले जनशक्तिको अभावमा चोरी तस्करी नियन्त्रणमा समस्या भैरहेको बताए । उनले कार्यालयमा दरबन्दी अनुसारको जनशक्ति नरहेको जानकारी दिए ।

उनका अनुसार ६ जना सुब्बाको दरबन्दी भएपनि हाल दुई जना मात्रै कार्यरत छन । उनी आफैले समेत सत्तीका अलावा बर्दियाको दुईवटा भन्सार कार्यालय समेत हेर्नुपर्ने वाध्यता रहेको छ ।

छोटी भन्सार कार्यालयका रुपमा रहेको सत्ती भन्सार कार्यालय २०७५ सालमा मुल भन्सारमा परिणत भएको हो । यो कार्यालय कैलाली जिल्लाको दक्षिण पूर्वी क्षेत्रमा अवस्थित छ ।