टीकापुर, पौष ७
नेपाल तरुण दल टीकापुर नगर कार्यसमितिले टीकापुर अस्पतालमा आज सरसफाई गरेको छ । तरुण दलले अस्पतालमा परिसरमा रहेको फोहोर सरसफाई गरेको हो ।
तरुण दलका नगर अध्यक्ष किरण कडायतले स्वास्थ्य संघ संस्था सफा, स्वस्थ भए विरामी र तिनका आफन्तलाई सहज हुने बताए ।
‘अस्पताल निकै संवेदनशील क्षेत्र हो, यसलाई हामी सबै मिलेर सफा र स्वस्थ राख्नुपर्छ’ अध्यक्ष कडायतले भने ‘तरुणमा आवद्ध तथा अन्य पार्टीका युवाहरुको सहभागितामा हामीले आफ्नो पहिलो कार्यक्रमका रुपमा सरसफाई कार्यक्रम गरेका हौं ।’
नगर अध्यक्ष कडायतले आगामी दिनमा समेत यस्ता कार्यक्रमहरुमा निरन्तरता दिने बताए ।
तरुण दलद्धारा आयोजित टीकापुर अस्पताल सरसफाई कार्यक्रमका प्रमुख अतिथि नेपाली काँग्रेसका केन्द्रिय सदस्य एवं प्रतिनिधि सभा सदस्य ईश्वरी न्यौपाने रहेकी थिइन् ।
एक शय भन्दा बढी युवाहरुको सहभागितामा अस्पताल परिसरमा सरसफाई गरिएको हो ।
