टीकापुर, मंसिर २५
टीकापुर उद्योग वाणिज्य संघले सुदूरपश्चिम औद्योगिक ब्यापार मेला तथा टीकापुर महोत्सव २०८० को आयोजना गर्ने भएको छ । संघले आज पत्रकार सम्मेलन गरी महोत्सव पुष २६ देखी माघ ७ गतेसम्म सञ्चालन हुने जानकारी दिएको छ ।

संघका अध्यक्ष चक्रपाणी सापकोटाले विगतका वर्षहरु झैं यसवर्ष पनि महोत्सवलाई निरन्तरता दिन खोजेको बताए । उनले संघ आयोजक भएपनि महोत्सव सम्पूर्ण टीकापुरबासीको साझा पर्व भएकाले सहयोगका लागि आग्रह गरेका छन ।

उनले महोत्सव सफलतापूर्वक सम्पन्न गर्न विभिन्न व्यक्ति र संघसंस्थाहरुसँग छलफल भैरहेको बताए । उनले विगतका वर्षहरु झैं महोत्सव सफल बनाउन यसवर्ष पनि सबैको सहयोग रहनेमा आशावादी रहेको बताए ।

महोत्सवमा स्थानीयदेखी राष्ट्रिय स्तरका कलाकारहरुको प्रदर्शनी रहने बताईएको छ । यसका साथै महोत्सवका कृषि, विज्ञान प्रर्दशनी समेत हुनेछ । महोत्सवस्थलमा थारु गाउँ समेत निर्माण गरिने भएको छ । यसअघिका वर्षहरुमा समेत महोत्सवस्थलमा थारु गाउँ निर्माण हुँदै आएको छ । थारु गाउँमा थारु कला, संस्कृति प्रर्दशन गरिनुका साथै खानपान पनि उपलब्ध हुने जानकारी दिईएको छ ।

यसका साथै महोत्सवस्थलमा अटोमोवाइल्स, स्थानीय उत्पादन लगायतको समेत प्रर्दशनी गरिनेछ ।