बाजुरा, मंसिर १४

बाजुरामा जिप दुर्घटना भएको छ । दुर्घटनामा एक जनाको मृत्यु भएको छ ।

अर्का एक जना घाइते भएका छन्। हिमाली गाउँपालिका-६ धुलाचौर नजिकै बोलेरो जिप दुर्घटना भएको हो । बिहीवार धुलाचौरबाट कोल्टीतर्फ आउँदै गरेको लु १ ज ४८२९ नम्बरको बोलेरो जीप धुलाचौर बजार नजिकै दुर्घटना भएको जिल्ला प्रहरी कार्यालय बाजुराले जनाएको छ ।

मृत्यु हुनेमा मुगु जिल्लाको खत्याड गाउँपालिका-९ का करिब २७ वर्षीय मदन सार्की रहेको जिल्ला प्रहरी कार्यालय बाजुराका प्रहरी निरीक्षक किशोरसिंह ऐरीले बताए । उनलाई उपचारका लागि कोल्टी प्राथमिक स्वास्थ्य चौकीमा पुगाइएको थियो । तर अस्पतालले मृत घोषणा गरेको प्रहरी निरीक्षक ऐरीले बताए ।

जिपमा सवार गौमुल गाउँपालिका-३ का करिब १८ वर्षीय बसन्त धामी घाइते भएका छन् । उनको खुट्टामा चोक लागेको र अवस्था सामान्य रहेको प्रहरीले जनाएको छ । चालकसहित एक जना भने सकुशल छन् । जिप चालक खत्याड गाउँपालिका-९ का दलबहादुर लावणलाई प्रहरीले नियन्त्रण लिएको छ ।